ШАХМАРДАН ҚОЙШЫБАЕВ: 6 АЙҒА ЖОСПАРЛАНҒАН ЖҰМЫСТАР 100% ОРЫНДАЛДЫ

16 шілде 2024, 15:10

1 503

Ауылшаруашылығындағы маңызды саланың бірі – мал шаруашылығы, - деп хабарлайды "Opennews.kz" ақпарат агенттігі.

Бүгінде бұл сала халықты түрлі тағам өнімдерімен, өнеркәсіпті шикізатпен қамтамасыз етіп отырғаны сөзсіз. Ал малдың әртүрлі қауіпті кеселге шалдықпауын, олардан алынатын өнімдердің адам денсаулығына зиян келтірмеуін қамтамасыз ету бағытында тынымсыз еңбек ететін ветеринар мамандарының қызметі ерекше екені айтпаса да түсінікті. Өткен жылы республика бойынша аса қауіпті жұқпалы 16 ауру түрі бойынша 235 елді мекен қолайсыз ошақ болып тіркелді. Оның ішінде ең көп ауру ошақтары Қостанай , Абай , Ақтөбе, Қарағанды , ШҚО , Жамбыл облыстарында. Бүгінгі таңда республика бойынша 85 ошақ тіркелсе, Өңірімізде ауру ошағы тіркелмей тұрақты жағдай сақталып отыр. Бүгін Өңірлік коммуникациялар қызметінің ақпарат алаңында облыстық ветеринария басқармасының басшысы Шахмардан Қойшыбаев биылғы жылдың I жартыжылдығына қорытынды жасады.

“Биылғы жылы, облыс көлемінде аурудыңалдын алу, эпизоотиялық тұрақтылықты сақтау мақсатында аса қауіпті 14 түрлі жұқпалы ауруларға республикалық бюджет есебінен 7468,5 мың дозаветеринариялық препараттар қаралып отыр. Облысқа бөлінген 3773,6 мың доза ветеринариялық препараттар аудандарға таратылды. Қазіргі күні, 6 айлық жоспарға сәйкес 3715,7мың доза препарат алдын ала егіліп, іс-шара 100%орындалды”,- деді Шахмардан Сұлтанбекұлы.

Биыл ветеринария саласы жетістіктерден кенде қалмады. Атқарылып жатқан жұмыстар жоғары бағаланып, еңбек ескерілді.

“Өңірімізде сапалы жүргізілген жұмыстардың нәтижесінде Дүниежүзілік жануарлар денсаулығы ұйымы арқылы облысымызға аусыл ауруынан таза аймақ мәртебесі берілді. Бұл өңіріміздің экспорттық әлеуетін арттыруға мол септігін тигізеді.
Облыста соңғы жылдары ауыл шаруашылығы жануарлары арасында аса қауіпті аурулар тіркелмей, эпизоотиялық тұрақтылық сақталды”, деді Шахмардан Сұлтанбекұлы.