Қызылорда облысында 17 сотталған қоғамдық жұмыстар атқаруда

Қызылорда облысы бойынша Қылмыстық-атқару жүйесі департаментінің  пробация қызметі есебіндегі 17 сотталған азамат сот үкімімен қоғамдық жұмыстарын  орындауда. Олар жергілікті орган белгілеген орындарда қоғамдық жұмыстар атқарып, күн сайын 4 сағаттан тазалық жұмыстарын жасайды.

Сот шешіміне сәйкес, кейбір азаматтар 40 сағат қоғамдық жұмыс атқаруы тиіс болса, енді біріне 200 сағат міндеттелген. 2025 жылдың алғашқы үш айында аталған 17 сотталған өздеріне жүктелген міндеттерді орындап, қоғамдық орындарды тазарту және абаттандыру жұмыстарын орындауда.

Қызылорда қалалық пробация қызметінің бастығы әділет майоры Фариза Сембаеваның айтуынша, қоғамдық жұмыстар – сотталған азаматтарды еңбекке баулудың, оларды қоғамға бейімдеудің бір жолы. Сонымен қатар, бұл олардың түзелуіне және қайта қылмыс жасамауына оң ықпал етеді.

Айта кету керек, қоғамдық жұмысқа тартылған азаматтар белгіленген сағаттарын толық өтегеннен кейін пробация бақылауынан босатылады. Ал сот үкімін орындаудан жалтарған жағдайда заң аясында тиісті шаралар қабылданады.