Қызылорда темір жолының 120 жылдығы өтті

4 тамыз 2025, 11:03

2 378

Қызылорда қаласында теміржолшылар күніне арналған салтанатты жиын өтіп, онда сала ардагерлері мен үздік қызметкерлерге айрықша құрмет көрсетілді. Мерекелік шараға "AMANAT" партиясы облыстық филиалының төрағасы Алмасбек Есмаханов, «Қазақстан темір жолы» ұлттық компаниясы» АҚ «Қызылорда магистральдық желі бөлімшесі» филиалының директоры Ербол Сәулебеков және «ҚТЖ – Жүк тасымалы» АҚ филиалының директоры Батырхан Базарбаев қатысты, - деп хабарлайды "Opennews.kz" ақпарат агенттігі.

Сала үздіктеріне құрмет көрсетілді

Жиын барысында сөз алған Алмасбек Есмаханов өз сөзінде теміржол саласының ел дамуындағы маңызды рөліне ерекше тоқталып, сала мамандарына алғысын білдірді.

«Біз теміржол саласы мамандарын мемлекетіміз бен "AMANAT" партиясының негізгі бағдарламалық мақсаттары мен міндеттерін белсенді орындаушы азаматтар ретінде құрметтейміз. Сіздер арқылы бір жағынан елдің экономикасы мен өнеркәсібі дамып жатса, екінші жағынан жол қатынасы жақсарып, азаматтарымыздың сапарлары сәтімен жүруде. Бұл – Сіздердің темірдей тәртіпке негізделген жауапты саладағы күнделікті уақытпен санаспай, үлкен шыдамдылық пен табанды еңбектеріңіздің жемісі», – деді ол.

Салтанатты рәсімде сала ардагерлері мен өндіріс озаттары жоғары кәсібилігі, мінсіз еңбегі және саланың дамуына қосқан үлесі үшін алғыс хаттармен және естелік сыйлықтармен марапатталды. Бұл – жылдар бойғы қажырлы еңбектің әділ бағалануы ғана емес, жас мамандарға да үлгі боларлық құрметтің айқын көрінісі.

Партия мүшелерінің белсенділігі жоғары

Бүгінде Қызылорда облысында теміржол саласында еңбек ететін 3500-ге жуық маман «AMANAT» партиясының белсенді мүшесі болып табылады. Бұл көрсеткіш сала қызметкерлерінің азаматтық белсенділігі мен қоғамдық өмірге атсалысу деңгейінің жоғары екенін білдіреді.

Мерекелік кеш – рух пен патриотизмнің символы

Жиын соңында ұйымдастырылған концерттік бағдарлама қатысушылардың мерекелік көңіл күйін көтеріп, отансүйгіштікке үндейтін патриоттық әндер орындалды. Өнерпаздар орындаған шығармалар елге қызмет етудің абыройлы іс екенін тағы бір мәрте айқындай түсті.

Бұл жиын – тек кәсіби мерекені атап өту ғана емес, ел экономикасының тірегіне айналған теміржолшылар қауымына деген шынайы ризашылықтың белгісі. Болашақта да бұл салада еңбек етіп жүрген азаматтарға қолдау көрсету жалғасын таба бермек.