Қызылордада әлеуметтік инфрақұрылым қарқынды дамуда: мектеп, стадион және тұрғын үй құрылыстары бақылауда
Облыс әкімі Нұрлыбек Нәлібаевтың төрағалығымен өңірдегі құрылыс нысандарының жай-күйіне арналған кеңейтілген жиналыс өтті. Жиынға облыстық мәслихаттың төрағасы Мұрат Тілеуімбетов, қала әкімі, салалық басқарма басшылары және құрылыс ұйымдарының жетекшілері қатысты, - деп хабарлайды "Opennews.kz" ақпарат агенттігі.
Басты назар — сапа мен мерзім
Аймақ басшысы жиналыс барысында өңірдегі барлық құрылыс жұмыстарының сапасы мен мерзімін қатаң бақылауда ұстау қажеттігін атап өтті.
«Жаңадан пайдалануға берілетін нысандардың өңіріміз үшін маңызы зор. «Жайлы мектеп» ұлттық жобасы аясындағы мектептердің, 11 мың орындық жаңа стадион мен тұрғын үйлердің сапасына, мерзіміне қатысты ешқандай мәселе туындамауы тиіс. Құрал-жабдықтары, жан-жағының абаттандырылуы толық дайын болуы керек», – деді Н.Нәлібаев.
Білім саласындағы жобалар
«Жайлы мектеп» ұлттық жобасы аясында Қызылорда облысында 2023 жылдан бері жалпы саны 6 900 орындық 10 мектептің құрылысы жүргізілуде. Оның ішінде:
6 мектеп толық салынып, жұмысын бастады;
Қалған 4 мектептің:
3-еуі (Қызылорда қаласындағы Арай мөлтек ауданында – 1500 орын, Қызылжарма м/а – 600 орын, Арал ауданы Сексеуіл кентінде – 300 орын) жаңа оқу жылына дейін ел игілігіне беріледі;
1 мектеп (Қызылорда қаласы, СПМК-70 м/а, 1500 орын) екінші тоқсанда пайдалануға тапсырылады.
Спорт инфрақұрылымы: жаңа 11 мың орындық стадион
Қызылорда қаласында салынып жатқан 11 000 орынға арналған жаңа стадион биыл қыркүйек айында пайдалануға беріледі. Жобаның ауқымы кең:
Инфрақұрылым: 1000 орындық автотұрақ, VIP-аймақ (40 орын), автобус тұрақтары, қазандық, резервуарлар, қоқыс алаңы;
Батыс сектор: спортшыларға арналған жаттығу алаңы, жуыну, киім ауыстыру, төреші, жаттықтырушы бөлмелері, массаж, допингтік бақылау, медпункт, комментатор кабиналары, конференц-зал;
Шығыс сектор: ауыр атлетика, бокс, гимнастика, акробатика, күрес, жаттығу залдары, қыздырыну бөлмелері;
Жанкүйерлерге арналған: санитарлық тораптар, тамақтану және демалыс аймақтары, кафетерий, VIP-кабинеттер.
Тұрғын үй құрылысы: мыңдаған пәтер халық игілігіне берілмек
2023-2029 жылдарға арналған Тұрғын үй-коммуналдық инфрақұрылымды дамыту тұжырымдамасы аясында тұрғын үй кезегінде тұрған азаматтарды баспанамен қамту бойынша нақты жұмыстар жүргізілуде.
Жоспар: 2025 жылға дейін жеке құрылыс салушылардан 3 022 жаңа пәтер сатып алу;
2025 жылдың басынан бері: Қызылорда қаласында 136 пәтер сатып алынды;
Тамыз айының соңына дейін:
- «Сәт-Сервис» ЖШС – 75 пәтерлік 1 тұрғын үй;
- «Ер-Ару и К» ЖШС – 220 пәтерлік 3 тұрғын үй;
- «Мелиоратор» ЖШС – 280 пәтерлік 7 тұрғын үй;
барлығы 575 пәтерлік 11 тұрғын үйдің құрылысы аяқталады.
Аймақ басшысы барлық жауапты мекемелерге құрылыс қарқынын бәсеңдетпеуді, жобалардың сапасын қамтамасыз етуді және нысандарды уақтылы пайдалануға беруді тапсырды. Қызылорда облысында әлеуметтік инфрақұрылымның жүйелі дамуы – өңір халқының өмір сапасын арттыруға бағытталған нақты істердің айқын көрінісі.
