Қызылордада синтетикалық есірткіге қарсы «APATTAN SAQTAN» атты кең ауқымды акция өтті
Қызылорда облысында жастар арасында есірткіге қарсы иммунитетті қалыптастыру және синтетикалық есірткі заттарының таралуына тосқауыл қою мақсатында «APATTAN SAQTAN» атты профилактикалық акция ұйымдастырылды. Іс-шараны Қызылорда облысының Полиция департаментінің Есірткі қылмысына қарсы іс-қимыл басқармасы мен Облыстық жастар ресурстық орталығы бірлесе отырып өткізді, - деп хабарлайды "Opennews.kz" ақпарат агенттігі.
Есірткіге қарсы – ерекше форматтағы үндеу
Акция барысында қала тұрғындарына ерекше әрі креативті формат ұсынылды – «Есірткіге қарсы болсаң – құшақта!» атты ашық үндеу. Бұл тәсіл тұрғындарға өз ұстанымдарын бейбіт әрі позитивті жолмен білдіруге мүмкіндік берді. Көпшілік акцияға белсене қатысып, қоғамда белең алып бара жатқан нашақорлық дертіне бейжай қарамайтындарын көрсетті.
Шара жастар мен қала тұрғындарына есірткінің зияны туралы нақты ақпарат жеткізуге, салауатты өмір салтын насихаттауға және құқық қорғау органдары мен қоғам арасындағы байланысты нығайтуға бағытталды.
Түсіндіру жұмыстары – басты назарда
Акция аясында «Заң мен тәртіп» тұжырымдамасы негізінде синтетикалық есірткі заттарының таралуына қарсы заңнамалық нормалар мен жауапкершілік туралы ақпараттық-түсіндіру жұмыстары жүргізілді. Жасөспірімдер мен жастарға бұл заттардың денсаулыққа, психикаға, өмір сапасына тигізетін ауыр зардаптары туралы кеңінен түсіндірілді.
Құқық қорғау органдары өкілдері есірткімен байланысты қылмыстардың алдын алу бойынша атқарылып жатқан жұмыстар туралы баяндап, қоғамды белсенді түрде атсалысуға шақырды.
Саналы ұрпақ – жарқын болашақ кепілі
«APATTAN SAQTAN» акциясы – бұл тек бір реттік шара емес, жастардың сана-сезіміне әсер ететін, қоғамдық жауапкершілікті арттыратын маңызды бастама. Синтетикалық есірткілерге қарсы күрес тек құқық қорғау органдарының ғана емес, барша қоғамның ортақ міндеті екені айқын.
«Синтетикалық есірткіге жол жоқ. Жастар есірткіге қарсы. Саналы ұрпақ – жарқын болашақ кепілі» деген ұранмен өткен акция қоғам назарын өзекті проблемаға аударып, алдын алу бағытындағы жұмысқа жаңа серпін берді.
