Әскерде қаза тапқан сарбаздардың ата-аналары митингке шықты

10 қараша 2025, 16:22

1 531

Бүгін Үкімет үйінің алдында әскерде қызмет етіп жүріп қаза тапқан сарбаздардың ата-аналары жиналды. Олар ұлдарының өліміне қатысты тергеудің әділ жүргізілуін талап етті, - деп хабарлайды "Opennews.kz" ақпарат агенттігі.

Журналист Лұқпан Ахмедьяров оқиға орнынан видео түсіріп, әлеуметтік желідегі парақшасында жариялады. Оның айтуынша, ата-аналармен кездесуге Қорғаныс министрі немесе ведомство өкілдері шығуы тиіс болған, алайда митинг басталған сәтке дейін ешкім келмеген.

Наразылыққа шыққандар бейбіт жолмен өз талаптарын жеткізді. Олар сарбаздардың өлімі жиілеп кеткенін айтып, кінәлілердің жазаланбай отырғанына қапалы.

“Сарбаздардың өлімі тоқтауы керек. Әділ тергеу жүргізілсін, әділ сот болсын!” — деді жиналған әйелдердің бірі.

Кейбір ата-аналар тергеу барысында дәлелдердің жойылатынын және офицерлердің жауапкершіліктен босатылатынын айтты.

“Кінәлілер жазасыз қалады, ал біздің балаларымыз құрбан болып жатыр. Бұл — әділетсіздік”, — деді наразылық білдірушілердің бірі.

Оқиға орнында полиция қызметкерлері кезекшілік етіп, жиналғандарға тәртіп сақтау және митингтің “заңсыз” екенін ескерткен. Алайда оларды тарату әрекеті болмаған.

Куәгерлердің айтуынша, ата-аналар плакаттар ұстап, Қорғаныс министрлігінің өкілдерімен кездесуді талап еткен.

Акцияға қатысушылар наразылық білдіруді мақсат етпейтінін, басты талаптары — шындықты анықтау, әскери жүйеде реформалар жасау және бейбіт уақытта сарбаз өлімін болдырмау екенін мәлімдеді.