«Банктер онлайн несие бермейді»: Мұрат Әбенов заңдағы биылғы өзгерістер туралы айтты

29 желтоқсан 2025, 13:38

1 532

Мәжіліс депутаты Мұрат Әбенов биыл Парламент қабырғасында қаралған басты заңдар мен олардың нәтижелері жөнінде пікір білдірді. Оның айтуынша, қабылданған маңызды шешімдердің бірі – онлайн несиелеуге шектеу қою, - деп хабарлайды "Opennews.kz" ақпарат агенттігі.

Депутат банк саласына қатысты азаматтардан көптеген шағым түскенін атап өтті. Осы мәселелерді талқылау нәтижесінде бірқатар ұсыныстар дайындалған.

«Банк жүйесіне байланысты өтініштер өте көп болды. Соның негізінде біз 28 түзету енгіздік: 18-і банк заңнамасына, ал 10-ы цифрлық кодекске қатысты. Қазіргі таңда банктер онлайн несие рәсімдемейді, енді барлық құжаттарға клиенттің жеке өзі барып қол қоюы міндеттелді», – деді ол.

Сондай-ақ Мұрат Әбенов құрылыс саласындағы заңнамаға енгізілген өзгерістерге тоқталды. Оның сөзінше, құрылыс нысандарына берілетін кепілдік мерзімі 10 жылға дейін ұзартылып, алғашқы екі жылда толық мемлекеттік бақылау енгізілген. Сонымен қатар, әкімдердің шешім қабылдау өкілеттігі шектелген.

«Бұл өзгерістер ең алдымен азаматтардың қауіпсіздігі мен құқығын қорғауға бағытталған. Президент те жуырда Астанада өткен кездесуде адам өміріне қауіп төндіретін жағдайларға бақылауды күшейту қажеттігін айтты», – деді депутат.

Әбенов алдағы уақытта тұтынушылардың құқықтарын қорғау туралы заңға да түзетулер әзірленіп жатқанын жеткізді. Атап айтқанда, авиация саласына мемлекеттік бақылауды күшейту, қайтарылмайтын әуе билеттері мәселесін шешу және билет бағаларын реттеу көзделіп отыр.

«Егер азамат билетке ақша төлесе, оны қайтарып алу мүмкіндігі болуы тиіс. Баға саясаты да бақылауда болуы керек», – деп түйіндеді ол.