Депутат мектеп асханасындағы тегін тамаққа қатысты қауіп барын айтты

"Мектеп оқушылары тегін тамақтан қағылып қалуы әбден мүмкін". Мұндай ойды мәжіліс депутаты Екатерина Смолякова айтты,- деп хабарлайды Оpennews.kz ақпарат агенттігі.

Сөзінше, елдегі білім ошақтарында балаларды тегін тамақтандырудың жаңа стандарты енгізілгенімен, оған тиісті қаржылық қолдау көрсетілмей отыр. Салдарынан астың сапасы төмендеп, кәсіпкерлер шығынға ұшырауы мүмкін.

Халық қалаулысы қосылған құн салығын ескере отырып, тарифтерді шұғыл түрде қайта қарауды талап етеді. Ол бұл мәселе бойынша премьер-министр Олжас Бектеновтің атына сауал жолдағанын жеткізген.

Тіпті өңірлерге арнайы барып, жағдайды зерделеген. Оның айтуынша, Шығыс Қазақстан, Ақтөбе, Ақмола және Қостанай облыстарында мәселе шешімін тапқан. Ал өзге өңірлерде жағдай өзгермеген.