Суррагат ана сәбиден бас тартты

12 наурыз 2026, 12:00

1 510

Алматылық 27 жастағы келіншек Қытай елінің азаматтарына суррогат ана болуға келіскен,-деп хабарлайды Opennews.kz ақпарат агенттігі Nur.kz сайтына сілтеме жасап.

Алайда тапсырыс берушілер нәрестені уақытынан ерте туғаны үшін қабылдаудан бас тартқан. Келісімшарттағы соманың да бір тиынын бермеген. Ал ешкімге керегі болмай қалған нәресте балалар үйіне өткізілген.

Кристина — суррогат ана боламын, қыруар қаржы табамын деп опық жеген келіншектің бірі. Қытай азаматтарының "сәби сүйгіміз келеді" деген қалауын ақысына орындауға келіскен. Бірақ үш айдан бері көк тиын көрмеген. Нәресте жеті айлық боп туғандықтан, тапсырыс беруші төлемақы төлемек түгілі, оны қабылдаудан да бас тартқан.

"Келісімшарт бойынша бала туғаным үшін гонорарым 7 500 000 теңге болуы керек еді. Кесар тілігі үшін қосымша 800 000 теңге қарастырылған. Егер бала қайтыс болса, төлем мөлшері басқаша болатын. Бірақ бала дүниеге келді. Ол шала туғанымен, жалпы жағдайы қалыпты болды. Ақыры ешкімге керегі болмай, сәбиді балалар үйіне тапсырдым. Клиникадағы заңгер маған баланы "өзің алып кетесің бе?" деп сұрады. Мен баланы ала алмаймын, себебі — менің балам емес", - дейді Кристина Гаврилюк.

Жыл сайын елімізде 150-ге жуық бала осылай суррогат жолмен дүниеге келген. Көбі тіпті мұны тұрақты табыс көзіне айналдырып алған. Кристинаның да бұл бірінші табысы емес. 27 жастағы келіншек бұған дейін құрсағын екі рет жалға беріп үлгеріпті. Әр дүниеге әкелген бөбек үшін он миллионға дейін ақша алған. Тек осы жолы өзі ойлағандай болмаған. Келісімшартта сәби жүктіліктің 32-аптасынан ерте туылса, келіскен соманың 70 пайызы өтелуге тиіс деп көрсетілген екен. Бірақ шетелдіктер мұны төлеуден де бас тартыпты. Амалы таусылған әйел полицияға арызданғанымен, нәтиже жоқ. Себебі бұндай істер тек азаматтық сот арқылы шешілуге тиіс дейді полиция департаменті.

"Аталмыш дерек бойынша Медеу ауданының полиция басқармасына қарасты полиция бөліміне арыз түсті. Барлық нақты мән-жайы анықталып болғаннан кейін қылмыстық немесе әкімшілік құқықбұзушылықтың құрамы болмағандықтан, бұл тіркелмеді. Бұндай істер тек сотта азаматтық құқықтық тұрғыда арыз жазу арқылы ғана аяқталады", - дейді Алматы қаласы полиция департаментінің ресми өкілі Салтанат Әзірбек.

Бүгінде нәресте балалар үйіне орналастырылған. Жағдайы қалыпты дейді дәрігерлер. Ал шетелдіктерден үміті үзілген ана енді азаматтық сотқа арыздануға кірісті. Жағдайды осылай ушықтырғаны үшін Кристина тапсырыс берушілерден тағы 5 миллион теңге өндіруді көздеп отыр.