Жантүршігерлік жол апаты полиция қызметкерлері оқиғаны анықтауда
Алматы қаласында бірнеше күн бұрын Әл-Фараби даңғылында екі автокөлік соқтығысып, салдарынан үш адам қаза тапты, - деп хабарлайды Opennews.kz ақпарат агенттігі kaz.inform.kz сайтына сілтеме жасап.
Қалалық полиция департаментінің бастығы Айдын Қабдұлдинов халықпен кездесу барысында резонанс тудырған жол-көлік оқиғасына қатысты сұрақтарға жауап берді. Ол жол апаты бойынша қылмыстық іс қозғалып, сотқа дейінгі тергеу амалдары жүргізіліп жатқанын атап өтті.
- Zeekr автокөлігінің жүргізушісі қазіргі уақытта ауруханада жатыр. Алдағы уақытта оған қатысты тергеу әрекеттері толық жүргізіліп, жүргізуші қамауға алынады, - деді полиция бастығы.
Айдын Қабдұлдинов жол апатының себептері, оның ішінде көше жарысы мен оқиғаға жоғары лауазымды тұлғаның қатысы туралы желіде тараған ақпараттарға да пікір білдірді.
- Полиция департаменті қызметтік тергеу жүргізіп жатыр, нақты құқықтық баға беріледі. Егер қызметкерлердің кінәсі анықталса, ең қатаң шараларды қолданамыз, - деді ол.
Алматы полициясы көшедегі көлік жарыстары туралы мәлімдеме жасады. Кейінгі үш тәулік ішінде қала жолдарында 5 мыңнан астам жол қозғалысы ережесін бұзу дерегі анықталған.
