Суға батып кеткен 8 жасар бала төрт күннен бері іздестіріліп жатыр
Түркістан облысы Келес ауданында суға кеткен баланы іздеу-құтқару жұмыстары жалғасып жатыр, - деп хабарлайды Opennews.kz ақпарат агенттігі kaz.inform.kz сайтына сілтеме жасап.
Төтенше жағдайлар қызметінің хабарлауынша, Келес өзенінде 8 жасар бала суға батып кеткен соң іздеу-құтқару жұмыстары басталды. Жергілікті атқарушы органдар мен ТЖМ құтқарушылары оқиға орнында жұмыс істеп жатыр. Анасының айтуынша, бала 23-ші наурыз күні сағат 17:00 шамасында ойнап жүрген кезде суға құлап кеткен. Құтқарушылар іздеу жұмыстарын жалғастырып, баланы анықтау үшін барлық мүмкіндіктерді пайдаланып жатыр.
- 2018 жылы туған баланы іздеу-құтқару жұмыстарына Төтенше жағдайлар департаментінің қызметкерлері, полиция, жергілікті атқарушы органдар, сондай-ақ тұрғындар мен туыстары жұмылдырылды. Жалпы 120-дан астам адам, 15 техника, 2 жүзу құралы және 2 ұшқышсыз ұшу апараты тартылған, - деді облыстық ТЖД бастығының орынбасары, полковник Асқат Ержанов.
Қазіргі уақытта іздеу жұмыстары жалғасып жатыр. (Видео)
- ТЖМ судағы қауіпсіздік ережелерін сақтауды және балаларды қараусыз қалдырмауды ескертеді, - деп нақтылады ведомство.
