Мал ұрлаған ұрылар 5 жылға сотталды
Жетісу облысында мал ұрлығы бойынша сотталғандар тек қылмыстық жаза алып қана қоймай, қылмыс құралы ретінде пайдаланылған көліктерінен де айырылып жатыр,- деп хабарлайды Opennews.kz ақпарат агенттігі Azattyq Rýhy сайтына сілтеме жасап.
Жетісу облысының прокуратурасы мал ұрлығы деректері бойынша мемлекеттік айыптауды қолдау кезінде қылмыс жасауға пайдаланылған құралдарды тәркілеуге ерекше мән беріп отыр. Қалыптасқан сот тәжірибесіне сәйкес, ұрланған малды тасымалдауға қолданылған автокөліктерді тәркілеу көбіне келтірілген шығын көлемінен бірнеше есе асып түседі. Қаратал аудандық сотының үкімімен үш адам екі бас ұсақ мал ұрлағаны үшін кінәлі деп танылды. Келтірілген шығын 140 мың теңгені құрағанымен, сотталғандарға салынған жалпы материалдық шығын әлдеқайда жоғары болды.
«Сот прокурордың уәждеріне сүйене отырып, кінәлілерге 5 жылға шартты түрде бас бостандығынан айыру жазасын тағайындады және қылмыс құралы ретінде автокөлікті мемлекет пайдасына тәркіледі. Осылайша, бір реттік заңсыз пайда табу әрекеті бағалы мүліктен айырылуға және соттылыққа әкеп соқты», – делінген прокуратура хабарламасында.
