Қазақстанда оқу орындары арқылы бюджет қаржысын жымқырған әйел сотталды

2 шілде 2026, 15:30

1 538

Оңтүстік Қазақстандағы екі колледж арқылы 1,3 миллиард теңге бюджет қаржысын жымқырды деп айыпталған Эльмира Дүйсенқызы 10 жылға бас бостандығынан айырылған,- деп хабарлайды Оpennews.kz ақпарат агенттігі.

Halyqstan Telegram арнасының дерегінше, бұл кәсіпкер әйелдің үшінші соттылығы. Ол 2018–2023 жылдар аралығында Оңтүстік Қазақстан жоғары медициналық колледжі мен Оңтүстік Қазақстан гуманитарлық-қаржы колледжінің құрылтайшысы бола отырып, жалған оқыту жүйесін ұйымдастырды деп айыпталған. Осылайша 1,3 миллиард теңге бюджет қаржысына қол салған.

Ал тергеу мәліметінше, бұл схемаға колледж басшылары, бухгалтерлер және басқа да тұлғалар қатысқан. Студенттер формалды түрде оқуға қабылданғанымен, іс жүзінде сабаққа қатыспаған. Соның нәтижесінде мемлекеттік білім беру тапсырысы мен кадрларды қайта даярлау бағдарламалары аясында қаржыландыру алынған.

“Оқуға қабылдау және жұмысқа орналастыру туралы жалған бұйрықтар, электронды цифрлық қолтаңбаларды пайдалану, сондай-ақ орындалған жұмыстар жөніндегі жалған актілер рәсімдеу арқылы бюджет қаражаты жымқырылған. Сонымен қатар, тергеу нұсқасына сәйкес, ақылы бөлімде оқитын кейбір студенттер мемлекет есебінен оқитындар ретінде рәсімделген. Ал Оңтүстік Қазақстан гуманитарлық-қаржы колледжі іс жүзінде жұмыс істемей, тек бюджет қаражатын игеру үшін пайдаланылған.
Тергеу барысында анықталғандай, Дүйсенқызы бұған дейінгі соттылығы бойынша жазасын өтеп жатқан кезінде де өз колледждерін басқаруды жалғастырған. Бұған дейін ол жеке мектеп арқылы бюджет қаржысын жымқырғаны үшін де сотталған” , – делінген хабарламада.

Тергеу кезінде күдіктілер өз еркімен 65 миллион теңге көлемінде шығынды өтеген. Сонымен қатар, үш пәтер (оның ішінде Дубайдағы), үш жеке үй және үш автокөлікке тыйым салынған.