Ипотеканың ережелері жаңарып, үй алу жеңілдеді
Отбасы банк ипотека рәсімдеу кезінде кепілге қоюға болатын жылжымайтын мүлік түрлерінің тізімін кеңейтті,- деп хабарлайды Opennews.kz ақпараттық агенттігі.
Енді қарыз алушылар 60 жылға дейінгі панельді үйлердегі пәтерлерді, сондай-ақ белгілі бір талаптарға сай келетін SIP-панельдерден салынған үйлерді кепілге қоя алады. Басты жаңашылдық панельді тұрғын үйлерге қатысты. Бұған дейін банк тек 50 жылдан аспаған панельді үйлердегі пәтерлерді кепілге қабылдаса, енді бұл мерзім 60 жылға дейін ұзартылған. Бұл бетон және керамзит-бетон панельдерінен салынған үйлерге қатысты. Осылайша, кеңес дәуірінде салынған көптеген үйлердегі пәтерлерді енді ипотека алу үшін қайтадан кепілге қоюға болады.
Сонымен қатар банк алғаш рет SIP-панельдерден салынған жеке тұрғын үйлерді де кепіл ретінде қабылдай бастады. Алайда бұл үшін бірқатар талаптар орындалуы керек.
Үй құрылыс компаниясы тарапынан салынып, пайдалануға берілгеніне 5 жылдан аспауы тиіс;
- SIP-панельдердің сәйкестік сертификаты болуы керек;
- Іргетасы суға төзімді материалдардан жасалуы тиіс;
- Үйдің ішкі әрлеуі толық аяқталуы керек,
Су, жылу, кәріз, электр сияқты барлық инженерлік коммуникациялар қосылған болуы қажет.
Бұл өзгерістер қарыз алушылардың Отбасы банкте ипотека рәсімдеу кезінде кепілге қоя алатын жылжымайтын мүлік түрлерінің тізімін кеңейтпек.
