Күйеуін өлтірді деп айыпталған әйел ақталды

Олардың айтуынша, сіңлісін танысқанына он күн болған ауыл тұрғыны алып қашқан. Екеуі де Алматы облысының Шеңгелді ауылында тұрған."Сіңліміз келін болып түскеніне 17 жылға жуықтады. Осы уақытқа дейін не құдалық, не той болған жоқ. Келін болып түскеніне бір жыл өтпей жатып, күйеуі ұрып-соғуды бастады. Енесі де оны мүлдем жақтырмады. Осы жылдар бойы үнемі олардың арасына түсіп отырды", – дейді күйеуін өлтірген әйелдің әпкелері.

"Жігіттің тұрмысы нашар болғанына қарамастан, Мәдина сол босағада қалды. 2010 жылы енесінің сіңлісі олардың үйіне келеді. Сол кезде Мәдина бізге: "Мені алып кетіңдерші, олар мені ұрып жатыр", – деп хабарласты. Барып, үйге кірсем, енесінің сіңлісі Мәдинаның шашынан жұлып, ұрып жатыр екен. Әрең ажыратып, ол әйелмен төбелесіп қалдым. Сөйтіп, сіңлімді алып кеттік", – дейді Жұлдыз есімді әпкесі.

"Мәдина бес-алты жылдай бала көтермеді. Бұл да енесінің ашуын туғызды. Кейін күйеуі емделіп, Мәдина 2016 жылы тұңғышына жүкті болды. Бірақ бала шала туды. Сол шала туған сәбиді алып қалып, Мәдинаны ақпан айында, аязда далаға қуып шыққан кездері де болды. Сіңліміз талай рет таяқ жеді, тіпті бір жолы көзінің тамырын жарып жіберді", – дейді Гүлжанат есімді әпкесі.

"Мәдина таяқ жеп, үйіне кетіп қалған кезде күйеуі Шеңгелдіге Қарақалпақстаннан келген әйелмен көңіл қосқан. Күйеу жігіттің әлегі мұнымен де бітпеді. Кейін тағы да екеуі ренжіскенде, менің әріптесіммен көңіл қосып алған", – дейді Гүлжанат.

"Күйеу бала намаз оқи бастап, Мәдинаны да күштеп намаз оқытқан. Кейін сіңліміздің денсаулығы нашарлап, намаз оқуды қойды. Мәдинаға қандай қиындық көрсеткенін біз сотта ғана естідік. Негізі, ол үнемі өте ашулы жүретін", – дейді әпкелері.

"2014 жылы Мәдина күйеуінен жыныстық жолмен берілетін жұқпалы ауру жұқтырған. Көктөбе жақтағы ауруханада жатып емделген. Оны тек анамыз білген. Сифилиспен ауырып, үш ай емделді. 2017 жылы да осы ауруды күйеуінен қайта жұқтырған. Екеуі анонимді түрде емделген", – дейді әпкелері.

"Күйеуі көзіне шөп салатынын ашық айтқан. Тіпті Мәдинаға: "Әйел ретінде мені қызықтырмайсың", – деген. Күйеуі Қонаевтағы әскери бөлімде байланыс саласында қызмет еткен. Біздің ойымызша, Дәуренге Мәдина мемлекет төлейтін ақша үшін ғана керек болған. Олар осы жұмыстың арқасында үш бөлмелі пәтер алып, көлік мінген. Дәурен Мәдинаны сол үшін ғана ұстаған", – дейді Гүлжанат пен Жұлдыз.

"Дәурен Мәдинаға: "Іш киімімді жу", – деген. Ал Маәдина бір күн бұрын күйеуінің тағы да көзіне шөп салғанын біліп, оның іш киімін жумайтынын айтқан. Алты айлық жүкті болатын. Теріс қарап, кір жайып тұрған кезде Дәурен келіп, бар күшімен екі аяғының арасынан тепкен. Мәдина алысып жүріп, далаға қашып шыққан", – дейді әйелдің туыстары.

"Мәдина балалары үшін қорыққан. Өйткені күйеуі өзін ғана емес, балаларын да ұратын болған. Ең үлкен ұлы әкесінен қатты қорыққан. Оны көрсе, дірілдеп кететін. Үйіне қорқа кіріп, "Дәурен, мені ұрасың ба?" деп сұраған. Дәурен "ұрам" деп диваннан тұра бергенде, Мәдина оның жүрек тұсына пышақ сұққан", – дейді әпкелері.

"Дәурен менің жалғыз ағам, арамыз – 12 жас. Менің сегіз жасымда Мәдина келін болып түсті. Арасында отбасылық жанжал болатын. Жеңгем талай рет кетіп қалып, талай рет қайтып келді. Араларында алты жыл бала болмады. Бірақ ағам жеңгемді тастаған жоқ. Менің өз ойым, жеңгем өте қызғаншақ болатын. Адамды орынсыз қызғанатын. Өз басым жеңгеммен ешқашан жанжалдасқан емеспін. Ата-анама тіл қайтарса да, жеңгеме қарсы сөз айтқан емеспін", – дейді марқұм Дәуреннің қарындасы Ардақ Әмірқұлова.

"Адамды өлтіру немесе өлтірмеу деген таңдау Мәдинаның қолында болды. Пышақпен үйге кіргенде ағам оған тиіскен жоқ. Төсекте ұйықтауға жиналып жатқан. Мәдина кіріп келіп: "Саған сұғамын", – деген. Ағам: "Сұқсаң, сұқ", – деген. Бір ғана пышақ соққысы жүрегіне дәл тиген. Ол аффект жағдайында болмаған. Тергеу кезінде Мәдинаның психикалық ауытқуы болмағаны анықталды", – дейді марқұмның қарындасы.

"Ешкімнен көмек сұрамайтын, ашық-жарқын адам еді. Ауылға барып, кез келген адамнан сұрасаңыз болады. Ал ағамның жұқпалы аурумен ауырғаны туралы нақты дәлел жоқ. Өлген адамның артынан бәрін айта беруге болады", – дейді Ардақ.

"Ағамның екі рет үйленбек болғанын естіген жоқпын. Бірақ екі жыл бұрын жеңгем бес айға кетіп қалғанда, ағам маған: "Мен Макодан тойдым, бірге тұрғым келмейді. Басқа әйел алғым келеді", – деді. Бірақ анам Дәуреннің ажырасам дегеніне көнбеді, өйткені немерелерін қимады", – дейді Ардақ Әмірқұлова.