Кәсіпкер 778 млн теңге заңсыз табыс тапқан

Ақтөбе облысында «Kazenergy» жеке кәсіпкерлігінің басшысы лицензиясыз қауіпті қалдықтарды өңдеп, пеш отынын өндіргені және қылмыстық жолмен алынған ақшаны заңдастырғаны үшін 3 жыл 9 айға бас бостандығынан айырылды, - деп хабарлайды  Opennews.kz ақпарат агенттігі. 

Тергеу деректеріне сәйкес, сотталған адам аумағы 10 мың шаршы метр болатын өндірістік базада бұл заңсыз әрекетті ұйымдастырып, нәтижесінде 11 миллион литрден астам сапасыз отын сатқан. Осы арқылы қылмыстық жолмен 778 миллион теңге табыс тапқан кәсіпкердің өндірістік нысаны, автокөліктері мен банк шоттарындағы ақшасы тәркіленді. 

Аталған іс бойынша шикізат ретінде пайдаланылған майлар, мұнай шламдары және құрамында мұнай бар өзге де қалдықтар қолданылған. Олар нафтамен араластырылып, айналым әдісімен өңделген. Алайда кәсіпкерге қауіпті қалдықтарды өңдеуге, залалсыздандыруға және кәдеге жаратуға қажетті лицензия мен экологиялық рұқсат берілмеген. 

Мамандардың айтуынша, өндірілген пеш отыны ұлттық сапа стандарттарына сай келмеген әрі құрамында зиянды химиялық заттар болған. Мұндай отынды тұрмыстық және өнеркәсіптік қазандықтар мен пештерде жағу кезінде ауаға улы заттар тарауы ықтимал еді. 

Бұл өңір тұрғындарының тыныс алу жүйесі мен денсаулығына қауіп төндірген.