Бір ай бойы тұрғындарды қорқытып, ақша бопсалаған алты адам ұсталды

Кеше, 16:30

1 509

Павлодар облысында тұрғындардан күш қолданамыз деп қорқытып, ақша талап еткен деген күдікпен алты адам ұсталды, - деп хабарлайды Opennews.kz ақпарат агенттігі.

Полицияның мәліметінше, күдіктілер бір ай бойы Павлодар тұрғындарынан ақша бопсалаған. Олар талап етілген қаражатты бермеген жағдайда күш қолданатынын және дене жарақатын салатынын айтып қорқытқан.

Жедел-іздестіру шаралары барысында күдіктілердің жеке басы анықталып, алты адам ұсталды. Олардың бесеуі уақытша ұстау изоляторына қамалды.

– Бопсалау фактілері бойынша қылмыстық істер қозғалды. Қазіргі уақытта қажетті тергеу әрекеттері жүргізіліп, болған оқиғаның барлық мән-жайы анықталып, сондай-ақ ұсталғандардың басқа да осыған ұқсас қылмыстарға қатысы бар-жоғы тексеріліп жатыр, – деді Павлодар облысы полиция департаменті ұйымдасқан қылмысқа қарсы күрес басқармасының бастығы Ғабит Қабдрахманов.