Ұлттық ұлан сарбаздары басшыларына QR арқылы анонимді шағымдана алады

Ұлттық ұланда сарбаздардың өтініштері мен шағымдарын қабылдауға арналған ULAN SENIM цифрлық жүйесі іске қосылды, - деп хабарлайды   Opennews.kz  ақпарат агенттігі.

Қосымша арқылы әскери қызметшілер өз мәселелерін аты-жөнін көрсетпей, тікелей қолбасшылыққа жеткізе алады.

Жүйе әзірге Алматыдағы 6654 әскери бөлімінде сынақтан өтіп жатыр. Оған кіру үшін сарбаз QR-кодты сканерлеп, өтініш санатын таңдап, мәселенің мән-жайын жазуы қажет.

Өтініштер әскери қызметтегі құқықтардың сақталуы, әлеуметтік-тұрмыстық жағдай, материалдық қамтамасыз ету, сыбайлас жемқорлықтың алдын алу және бөлімдегі моральдық ахуал сияқты мәселелерді қамтиды. Сондай-ақ сарбаздар өз ұсыныстарын да жолдай алады.

Әр өтінішке жеке нөмір беріліп, оны қарауға үш күн уақыт бөлінеді. Ал сарбаздар өз өтініштерінің қаралу барысын қосымша арқылы бақылай алады.