Волейбол жаттықтырушысы оқушысын ұрғаны үшін сотталды

Ақжайық ауданының №2 аудандық соты кәмелетке толмаған тәрбиеленушісіне күш қолданған волейбол жаттықтырушысына үкім шығарды, - деп хабарлайды   Opennews.kz  ақпарат агенттігі.

 Ер адам жасөспірімнің денсаулығына қасақана жеңіл зиян келтірді деген бап бойынша сотталды.

БҚО сотының баспасөз қызметі хабарлағандай, бапкер мен оқушы арасындағы жанжал соңғысының жарысқа барудан бас тартуынан туындаған. Оқушының жауабын естіген жаттықтырушы ашуланып, қол жұмсаған: ол жасөспірімді бетінен екі рет қолмен ұрып, кейін кеудесінен тепкен.

Соққыдан бала артқа қарай ұшып, басын қабырғаға соққан. Үйге келген соң бала денесінің қатты ауырып жатқанына ата-анасына шағымданған, содан кейін отбасы дәрігерлерге жүгінуге мәжбүр болған.

Іс материалдары мен дәлелдемелерді зерттеген сот спорт жаттықтырушысын кінәлі деп тапты. Оған бір жылға бас бостандығын шектеу түріндегі жаза тағайындалды.Үкім заңды күшіне енді.