Қызылорда облысының тұрғындары емхананың жоқтығына шағымданды
446
Қызылорда облысы Арал ауданына қарасты Сексеуіл кентінің тұрғындарының денсаулығы сыр берсе, 60 шақырымдағы аудан орталығына баруына тура келеді- деп хабарлайды Opennews.kz ақпарат агенттігі Астана арнасына сілтеме жасап.
Сексеуілде бұған дейін сырқаттарға қаралатын жер болмай, 3 жыл бұрын емхананың құрылыс жұмыстары басталып халықты бір қуантқан еді. Алайда басы басталған жұмыс әлі күнге дейін сол күйі бітпей тұр. Жұртшылық жоғарыдағыларға шағымданып шаршаған.
“Бәрінен бұрын жүкті әйелдерге қиын. Босану үшін ауданға көлікпен баруға тура келеді. Тіпті жолда босанып қалғандар да бар. Көлік ішінде жағдай болмағандықтан ана мен бала өміріне өте қауіпті”, – дейді тұрғын Ғабит Мырзашев.
Ауыл ақсақалдары әкімдік табалдырығын күнде тоздырса да, қонымды жауап берер жанның жоқ екендігін айтады. Ал ауылдағы емхана есебінде тұрған бұрынғы ғимараттың жағдайы болса қирауға жақын. Тұрғындар лас, көне ғимаратқа жаңбыр жауса су ағады, одан қалса шұрық-тесіктерінен бәрі көрінетіндігін айтады. Талай жиналыста да осы мәселе бойынша шағымданғандарын жасырмады.
“Құрылысқа жауапты компанияның мердігері тапсырылған жұмысты аяқтамағаны үшін сотқа берілген. Енді қайта қаржыландыру арқылы құрылыс жұмыстары келесі жылы жалғасады”, – деп жауап берді ауыл әкімі Сәкен Төрешов.
40 төсек-орындық аурухананың салынуына осыған дейін миллиондаған ақша бөлінген. Алайда, соңына жетпеген істің жалғасы тек келесі жылы жасалынады. Бірақ арман болған емхана халық игілігіне қашан берілетіні белгісіз.
