Ақтөбелік балақайдың анасы қасиетті жұмада көмек сұрады

Төрт жасар ақтөбелік Исмаил Аймахан өзге балалардан ерекше болып туылды. Ата-анасы Исмаилдың дамуындағы кемшіліктерді 3 жасында біле бастаған. Әсіресе, баланың тілі шықпай, жиі талып қалатыны ата-анасына қатты батып отыр деп хабарлайды "opennews.kz"  ақпарат агенттігі.

Исмаилдың анасы Ақтоты Сәдуақастың айтуынша, бала дүниеге келгенде айтарлықтай ерекшелік болған жоқ. Бірақ уақыт өте келе сәбидің дамуынан кемшіліктер көріне бастайды. "Баламыз көзге тіке қарамайтын еді. Атын атағанда да мән бермейді. Тіпті, кей кездері тоқтамай күлетінді шығарды. Мұның бәрі мені алаңдата бастады. Ал оның есінен танып қалған сәті күні кешегідей көз алдымда. Себебі, жолдасым білім алу мақсатында сабағында болатындықтан, баламен бірге күні бойы мен отыратынмын. Ұлымның көпке дейін ес-түссіз, қалтырап жатқан кезін еске алмауға тырысамыз. Өкінішке қарай, мұндай жайттар бізде жиі кездесіп тұрады. Алғашында қалай көмек беруді білмедік, кейін оған да үйрендік", - дейді Ақтоты. Ата-анасы Исмаилдың тілі шықпағанына, өздігінен дәретке бармайтынына қатты алаңдай бастайды. Оған баланың жиі талып қалатыны қосылып, дамуы кешеуілдей берді. Дәрігерлер психикалық дамудың тежелуі, аутистік спектрдің бұзылы және фокальды эпилепсия диагнозын қойып отыр.

"Біз оқуды жақында бітіргендіктен, әлі тұрақты жұмысымыз да жоқ. Негізі Ақтөбеде тұрамыз. Білім алып, өз аймағымызға ораламыз дегенде, баламыздың сырқатын анықтадық. Баланы дамыту орталықтары мен жақсы дәрігерлер Алматыда болғасын, осында пәтер жалдап, бар тапқанымызға Исмаилды емдетіп жатырмыз. Ұлымыздың талмасы болғандықтан, миға стимуляция беретін түрлі терапияларды ала алмаймыз. Десе де, Исмаилдың дертіне қарап отыру мүмкін емес, өзімізді қолға алып, жан жақтан ем іздей бастадық. Бүгінде туған-туыс, дос-жаранның көмегімен Ташкенттегі білікті дәрігерге барып қайттық. Қуанышқа қарай, ол жақтан нәтиже жақсарды. Ұлымыз сөйлей бастады, өздігінен дәретке баратын болды. Бұған жүрегіміз жарыла қуандық. Өйткені, күні кешеге дейін жөргекпен жүретін, дәрет сындыруды білмейтін еді. Бұл ана ретінде маған ауыр соқты", - дейді баланың анасы. Бүгінде ата-анасы Исмаилдың кезекті рет Ташкентке баруына қаражат таба алмай отыр. Олар бар тапқан қаржысын емге салғанымен, жас отбасыға ұлының сырқаты қымбатқа түсуде. 

Халықтан көмек сұрау біз үшін оңай емес. Басында намыс жібермеді. Алайда, ұлымыздың аман-сау болғанын көру үшін бәріне дайынбыз. Қаржыдан қатты қысылдық, ұлымызды емдетпей тағы отыра алмаймыз. Өйткені, Ташкенттен нәтиже шықты, Исмаилдың сөйлеп, қатарына қосылып кететін мүмкіндігі зор. Тек емді үзбеу керек. Әр үш ай сайын курсқа баруымыз қажет. Мемлекеттен мұндай ерекше балаларға көмек жоқ. Міне, кезекті ем уақыты жақындап қалды. Біздің бар жиған-тергеніміз де бір миллион теңгеге жетпей тұр. Сондықтан, қасиетті жұмада мейірімді жандардан көмек сұраймыз. Исмаилдің еркін сөйлеп, қатарынан кем болмағанын қалаймыз. Жұмада көмек күтеміз", - дейді бүлдіршіннің анасы Ақтоты Сәдуақас. Исмаилдың еміне көмектесем деушілер үшін реквизиттер: 
Тел.номері: 8 702 502 96 66 Айбек А (Исмаилдың әкесі) 
Kaspi Gold: 4400 4301 8300 9049 
ИИН: 930212300650