Қызылорда қаласы әкімі кімнен қорғанып жүр?

Қызылорда қаласының әкімі Асылбек Шәменовтың қала тұрғындарымен кездесуі барысында күзетшілері мен нөкерлері қала тұрғынына сұрақ қойдырмай кедергі келтірген, - деп хабарлайды Opennews.kz ақпарат агенттігі.

Батырхан Шүкенов атындағы саябақта қала әкімі Асылбек Шәменов қала тұрғындарымен кездесу өткізген. Десек те, қала әкіміне сауал қоюға асыққан Youtube желісінде  «Orda.tv» каналының жүргізушісі:

«Әкімге сауал қойдырмай тұрған нөкерлер мені тартқылауда. Әкім тұратын жер, халық тұратын жер деп сызып қойыңыздар,онда...» - деді ашуға булыққан Ержан.

Қала әкімінің не жасырғаны болды? Әкімге сауал қойдырмауына не себеп? Бұл жөнінде қала әкімінің баспасөз хатшысы:

«Бізге алдын-ала ескертіп, сұрақ қоятындығын айтқан. Алайда қала тұрғындарымен кездесу барысында Ержанның тұрғындарға кедергі келтіргендігіне қызметте жүрген әріптестеріміз бірауыз пікір білдірген болатын. Алайда, ол оны кері бағытта түсініп, өз ыңғайына қарай бұрмалап алды. Ол кісі бір емес бес сұраққа жауап алды», - деп жауап берді.

Десек те, қала әкімінің кездесуін қалалық және облыстық телеарналар мен газет беттеріне арнайы жариялағандығын атап өтті. Алайда аталған жариялымдарын таба алмадық. 
Бұл жөнінде желі қолданушылары:

«Әкімдер  неден  қорқады  арты  таза  болса. Қорғаушы  неге  керек әкімге. Босқа  ақша  шығындап. Әкімдер  оққағарсыз  жүре  алмайды ма?» - дейді Құралбай Қожымбетов.

«Алдыңғы қатардағылар жақсы дайындалыпты», - дейді Нұрбол Күдебаев.

«Ал керек болса кездесуде халыктан шабарман көп екен», - деп жазды желі қолданушылары.

Иа, желі қолданушылары өз пікірлерін ашық жазуда. Бірі кездесуге мұғалімдер мен  бата беретін ақсақалдар ғана жиналған десе. Екіншілері көзбояушылық кездесуге балап пікір қалдыруда. Алайда қала әкімдігінің баспасөз хатшысы бұл ақпараттарды жоққа шығаруда.