Қызылордадағы «Өркендеу» саяжайы өркендей ме?

7 қыркүйек 2022, 14:09

2 759

Қызылорда қаласындағы «Еңбек» саяжайының тұрғындары құзырлы орындардың назарынан тыс қалғанына наразы, - деп хабарлайды Opennews.kz ақпарат агенттігі.

Тұрғындардың айтуынша, саяжайда тұрмыс кешу үшін ешқандай жағдай жоқ. Қала аумағынан жырақта орналасқан «Еңбек», «Өркендеу» және «Игілік» саяжайлары біріктіріліп, «Еңбек» саяжайының құрамына кірген. Саяжай аумағында 200-ге жуық шаңырақ мекен етуде.

«2016 жылдан бері бұл жерге құзырлы орындар тарапынан ешқандай көңіл бөлінбей отыр. Электр желісін өз күшімізбен тартып алдық. Жерасты суын тұтынып отырмыз. Ауызсудың сапасы сын көтермейді. Бір күннен артық тұрса, суымыз сарғайып кетеді. Сәл жел тұрса, жарығымыз өшіп қалады. Жолымыз жауын жауса, лай батпаққа айналып, жүру мүмкін болмай қалады. Көшемізде көлік жүретін жол да жоқ. Қала аумағына қосылсақ та саяжайда шешілмеген мәселелер көп», – дейді саяжай тұрғыны Шайханбек Ақбергенов.

Жауапты орындардан арнайы мамандар келіп, көшені жарықтандыру жұмыстары 15 тамызда бастау алатындығын хабарлаған екен. Алайда берілген уәде аяқ асты қалған.
Жол мәселесіне келер болсақ, саяжайдан жер беру кезінде кеткен өрескел қателіктен туындаған, - дейді тұрғындар. Бос жатқан жерлердің көпшілігі кәсіптік мақсатта берілген екен. Ал, жер иелері өз иелігіндегі жерді қоршап, көліктің кіріп-шығуына мүмкіндік қалдырмаған. Осы мәселе төңірегінде облыс, қала әкіміне, Тасбөгет кенті әкімдігіне, тиісті бөлімдерге бірнеше мәрте шағымданған. Алайда оны елеп-ескеріп жатқан билік жоқ.

«Ала жаздай шаң-тозаңға тұншықсақ, жаңбыр жауса, лай-балшықпен жүру жанды қинайды. Ұялы байланыс сапасы да нашар. Ауызсуға келер болсақ, саяжайдың 40 пайызы қамтылған. «Еңбек» пен «Игілік» халқы таза ауыз су тұтынып отыр. Ал қалған 60 пайызы жерасты суын ұңғыма арқылы ішуге мәжбүр.», – дейді саяжай тұрғыны Серік Смағұлов.

Ол аздық еткендей, қоғамдық көлік мәселесі де мен мұндалап тұр. Саяжайға қатынайтын небәрі үш қоғамдық көлік қатынайды. Оның өзі лық толы келгендіктен, көп жағдайда тоқтамай өтіп кетеді екен. Наразылықтарын әкімдік жағаласақ та, шеше алмай келеміз деген тұрғындар сабаққа қатынайтын балалар үшін үлкен қиындық туғызып отырғанын айтып ашынады.
Саяжайдағы бірқатар мәселелер бойынша Қызылорда қалалық әкімдігіне хабарластық.

«Әкімдік тарапынан саяжайға жол салу бойынша жоспар жасалынбаған. Алайда жаздық-маусымдық орын болғандықтан қала аумағына жатпайды. Соған қарамастан, мектеп оқушыларына арнайы автобустар беріліп, жарық пен су толық қамтамасыз етілген. Ал, жол мәселесі жоспарға кірмейді», - дейді қала әкімінің баспасөз орталығының өкілі.

Қалай дегенде де, қараңғы көшеде қалған «Өркендеу» саяжайы тұрғындарының жанайқайы бүгін-ертең шешімін таппайтын сыңайлы. Десек те, құзырлы орындар тарапынан үн қосар деген үміт бар.