Қызылордалық полицейлер шағын футболдан турнир өткізді

Қызылордада криминалдық полиция басқармасының ұйымдастыруымен шағын футболдан турнир өтті, деп хабарлайды Opennews.kz ақпарат агенттігі.




5 қазан қылмыстық іздестіру қызметінің 104 жылдығына орай “Динамо” спорт кешенінде Қызылорда облысының ПД қызмет салалары, ардагерлері арасында Криминалдық полиция басқармасының ұйымдастыруымен шағын футболдан турнир өтті. Турнирдің ашылу салтанатына Қызылорда облысы ПД басшылығы, ішкі істер органдарының ардагерлері, сондай-ақ “Динамо” дене шынықтыру-спорт қоғамының облыстық филиалының өкілдері қатысты. Полиция департаменті бастығының орынбасары Байжан Байгелді турнирді ашып, сөз сөйледі.

Ішкі істер органдарының аса маңызды құрылымдарының бірі, ол – қылмыстық іздестіру қызметі. Қылмыстың ашылуына, қылмыскерлерді құрықтауда жедел әрекет ететін қылмысты іздестіру саласының қызметкерлері, оның ішінде жедел уәкілдердің жұмыстары қиын да күрделі. Осыдан болса керек, сонау 1918 жылдан бері қылмыстық іздестіру күні арнайы бекітіліп, полицейлер арасында мерекеленіп келеді. Өздеріңіз білетіндей, мұндай жарыстар қызметкерлер арасында спортты дамыту, даңқты дәстүрлерді нығайту, ойыншылар арасында құрметті қарым-қатынас орнату үшін маңызды. Жарыс жоғары деңгейде, командаларға лайықты жеңістер, барлық қатысушыларға спорттық мерекеден ұмытылмас әсер қалдыруын тілеймін, – деді Байжан Байгелді. 

Жарысқа 8 команда қатысты. Ойынның міндеттері мен шарттарын анықтайтын арнайы комиссия құрылды. Шағын футболдан жарыс аяқталғаннан кейін командалар арасындағы орындар келесідей бөлінді: бірінші орынды ҚПБ патрульдік полиция батальоны командасы жеңіп алса, екінші орынды – АДБ, КСБ және Штаб басқармаларынан құрылған командасы иеленді, ал үшінші орын – облыстық ПД жедел қызметкерлері командасына бұйырды.

Сондай-ақ, полиция қызметкерлері арасында “Үздік ойыншы” зейнеткер Жұманов Раушанбек, “Үздік шабуылшы” Абилаким Нариман, “Үздік қақпашы” Тұрсынов Алмат, “Үздік қорғаушы” Есенбеков Азамат атанды. Жарысқа қатысушылар мен жүлдегерлер департамент бастығының дипломымен, кубоктармен, медальдармен марапатталды.

Қылмысқа қарсы күрес, құқық бұзушылықтың алдын алу және қоғамдық тәртіпті сақтау – ішкі істер органдары қызметкерлерінің басты міндеті. Қылмыстық іздестіру сала қызметкерлерін мерекелерімен құттықтай отырып, дендеріне саулық, қызметте абырой, отбасыларына амандық тілеймін, -деді Қызылорда облысы ПД бастығының орынбасары Даурен Ибраев.