Ат құлағында ойнайтын 24 жастағы қыз желіде жұлдыз болуда

24 жастағы Асыл Ахметова жеті үйір жылқыны жалғыз өзі бағады. Солтүстік Қазақстан облысының бір түкпіріндегі ауылда әкесіне қолғабыс етіп, жылқы бағатын бойжеткен аз уақыттың ішінде желі жұлдызына айналып үлгерген. Асылдың Tik-Tok желісіндегі парақшасын тіпті ресейліктер де сүйсіне қарайды.

Асыл Ахметова СҚО-дағы Озерное ауылында ата-анасымен бірге тұрады. Жастайынан әкесінің қасынан қалмай, мал бағуға шығатын қыз жылқыға ерекше жақын болғанын айтады.
 Мектеп бітіргесін Нұр-Сұлтан қаласындағы политехникалық колледжді тәмамдаған бойжеткен қалада көп тұрақтай алмаған. Ауылдағы өмірі мен жылқыларын сағынған ол карантинді сылтау етіп, туған өлкесіне қайта оралған екен. 

"Карантин кезінде ауылыма келдім. Мен қалада оқып жүріп, жұмыс істейтінмін. Алматыға да барып еңбек еттім. Бірақ, мен ауыл өмірін аңсап тұратынмын. Бір жағынан әкем мен анам жалғыз тұрады. Әкем жылқышы болған соң, үйде болмайды. Жұмысы ауыр. Сондықтан, оларға көмектесуім керек деп шештім", - дейді ол. 

Осылайша, Асыл ауылға келе салысымен әкесімен бірге жылқы бағуға шығатын болған. Қазіргі таңда олар ауыл-аймақтағы жеті үйір жылқыға бас-көз болып отыр.

 "Әкем екеуіміз кезектесіп бағамыз. Ол түске дейін. Мен түстен кейін. Сөйтіп, түннің бір уағына дейін жайылымда жүремін", - дейді еңбекқор қыз. 

Жергілікті бәйгелерде жігіттермен бірге додаға қатысып, оза шабатын бойжеткен ат құлағында ойнайды. Ат үстінде күрделі трюктер жасап дағдыланған ол бұл істі жаны сүйетінін айтады. Бұдан бөлек, батыл қыз мотоцикл айдауды үйреніп алған.

"Жайылымдағы әкеме жету үшін мотоциклмен барамын. Жалғыз жылқы бағу оңай емес. Кей кездері әртүрлі жайттар орын алады. Соның бәріне дайын болу керек. Ат жарақат алып қалуы мүмкін, кейде туып қалады. Мұндай кездері алғашқы көмек көрсетемін", - дейді Асыл. 

Асылдың айтуынша, бүгінде еліміздің солтүстігіндегі ауылдардың жағдайы мәз емес. Тұрғындар қалаға көшіп, көптеген ауылдар қаңырап бос қалуда. Мектептер жабылып, онсыз да көнеріп тұрған жол мәселесі тіпті күрделене түсіпті.

 "Ауылымды көркейткім келеді. Жуырда мектепке тәрбие ісінің меңгерушісінің орынбасары болып жұмысқа тұрмақпын. Шақырып отыр. Ауылды жақсы көремін. Бірақ ауылдың жағдайы нашарлап барады. Орталықтандырылған су жоқ. Жол нашар. Жедел жәрдем келмейді. 70 шақырым жердегі аудан орталығына әзер жетеміз. 21-ғасырда байланыс тіптен жоқ. Интернет әзер ұстайды", - деп ауыл проблемаларымен бөлісті Асыл. 

Дегенмен соған қарамастан, бойжеткеннің жылқы бағып жүріп түсіріп, желіде жариялаған видеолары танымал болып кеткен. Бұны ауыл өміріне деген қызығушылық деп түсіндірген Асыл оның желідегі парақшасын тіпті ресейліктер сүйсіне қарайтын айтты.