Футзалдан іріктеу кезеңінде Қазақстан құрамасы жеңіске жетті

Футзалдан Қазақстан құрамасы Румынияны жеңді, - деп хабарлайды "Opennews.kz" ақпарат агенттігі.

Ел құрамасы А тобында сынға түседі. Қарсыластары – Румыния, Әзербайжан және Нидерланд құрамалары.

Бүгінгі кездесуде қазақстандық футзалшылар алғашқы минутта жинақы қимыл көрсетті. Нәтижесінде 2-минутта Джуниор Дуглас есеп ашты. Оған қарсыластар бір голмен жауап қайырды.

Одан кейін Альберт Ақбалықов 11, Эдсон Гомеш 16-минутта Қазақстан құрамасының басымдығын арттырды. Ал 20-минутта Біржан Оразов мергендік танытты.

Ендігі кезекте қарсылас құрама қақпашысын бесінші ойыншыға алмастырып, екі гол соғып кетті.

Осылайша ел құрамасы қарсыласынан 4:3 есебімен басым түсті.

Еске салсақ, бұдан бұрын футзалдан Қазақстан құрамасы Нидерландтан басым түсті.

Айта кетсек, екінші іріктеу сатысында қазақстандық футзалшылар Черногория (7:0, 5:1) мен Словенияны (2:0, 3:3) артта қалдырып, өз тобында бірінші орын алды.

Енді ел құрамасы 6 қазанда сырт алаңда Әзербайжанмен шеберлік байқасады.