«Барыс» командасы Ресейдің «Динамо» командасын жеңді

Қазақстандық «Барыс» командасы Құрлықтық хоккей лигасындағы кезекті ойынын елордада Ресейдің «Динамо» (Мәскеу) командасына қарсы өткізді, - деп хабарлайды "Opennews.kz" ақпарат агенттігі ҚазАқпаратқа сілтеме жасап.

Астаналық клуб биылғы маусымды сәтсіз өткізіп келеді. Соңғы 10 ойынның небәрі үшеуінде жеңіске жетті.

Қатарынан бес мәрте жеңілістің ащы дәмін татқан «Барыс» өткен турда Ресейдің «Трактор» (Челябі) командасынан басым түсті.

Бүгінгі кездесуде де қазақстандық команда жинақы қимыл көрсетті. Нәтижесінде 3-минутта «Барыс» хоккейшісі Әділ Бекетаев көздеген нысанадан мүлт кеткен жоқ.

Одан кейін 7-минутта Джордан Уил таразы басын теңестіріп кетті.

Ал 9-минутта елордалық клубтан Райли Барбер «Барысты» алға шығарса, одан кейін 35-минутта ресейлік Никита Гусев өз мүмкіндігін пайдаланды.

Ойынның негізгі кезеңі 2:2 есебімен тең аяқталып, овертаймға ұласты. Овертаймда жеңімпаз анықталған жоқ. Буллитте елордалық клубтың жолы болды.

Осылайша олар қарсыласынан 3:2 есебімен басым түсіп, қатарынан екі мәрте жеңіске жетті.

Енді «Барыс» елордада 13 қазанда Ресейдің «Локомотив» (Ярославль) командасымен кездессе, 15 қазанда «Металлург» (Магнитогорск) клубымен шеберлік байқасады.