Шахматтан Қазақстан құрамасы Олимпиада үздіктерінің қатарына енді

20 қыркүйек  Будапеште (Венгрия) өтіп жатқан шахмат Олимпиадасының сегізінші раунды аяқталды. Қазақстан құрамасы Олимпиада үздіктерінің қатарына енді, - деп хабарлайды "Opennews.kz" ақпарат агенттігі.

Қазақстанның әйелдер құрамасы турнир кестесінде төртінші орында тұрған Францияның ұлттық командасымен кездесті. 8-ші раундта Қазақстан атынан: Бибісара Асаубаева, Меруерт Камалиденова, Амина Каирбекова және Алуа Нұрман шықты.

Бірінші партияда Меруерт Камалиденова франциялық Софи Мильемен ойнады. Франция шахматшысы ұтты.

Келесі екі партияда команда капитаны Бибісара Асаубаева Дейманта Даулите-Корнетті, Алуа Нұрман Полина Гишарды жеңді. Осылайша олар құрама қоржынына 2 балл қосты.

Соңғы партияда Амина Каирбекова мен Наташа Бенмесба кездесіп, ойын тең аяқталып, екі командаға жарты балдан берілді.

Төрт партияның қорытындысы бойынша 2,5:1,5 есебімен Қазақстан ұлттық командасы жеңіске жетіп, Үндістан, Польша командаларымен бірге үздіктер қатарына қосылды.

Тоғызыншы раундта Қазақстан құрамасы турнир кестесінде екінші тұрған Польша командасымен кездеседі.