«Мен қазір көтеріліп кеткенмін…»: Қазақ боксшысы «Канелоның» жеке ұшағымен ұшты
Қазақстандық боксшы Бек Нұрмағанбет танымал мексикалық спортшы Сауль «Канело» Альвареспен бірге түскен видеосын жариялады, - деп хабарлайды "Opennews.kz" ақпарат агенттігі.
Бейнежазбада қазақстандық спортшы мен Альварестің жеке ұшаққа бара жатқанын көруге болады. Ұшақ мексикалық боксшыға тиесілі. Видеоны спортшы өзінің Instagram-парақшасына жүктеген.
«Мен қазір көтеріліп кеткенмін…» - деп әзілдеп жазба қалдырды Бек Нұрмағанбет.
Mundodeportivo басылымының мәліметінше, видеодағы Embraer Legacy 500 үлгісіндегі ұшақтың иесі - «Канело». Аталған әуе кемесінің нарықтағы бағасы - шамамен 18,4 миллион доллар.
Айта кетейік, Бек Нұрмағанбет қазіргі уақытта «Канелоның» залында жаттығады әрі мексикалықтың спарринг-серіктесі. Қазақ боксшысының даярлығы мексикалық супержұлдыздың жеке бапкерінің қадағалауында.
