Облыс әкімі Әлем чемпионын марапаттады: Айдос Сұлтанғалиға баспана мен автокөлік берілді

Хорватияда өткен  Әлем чемпионатында жерлесіміз Айдос Сұлтанғали 60 кг салмақ дәрежесінде жеңімпаз атанып, ширек ғасырдағы тарихи жеңістің шыңынан көрінді! Бұл жеңіс - тек спорттағы ғана емес, еліміздің атын халықаралық аренада одан әрі биіктеткен оқиға. Айдос Сұлтанғали өзінің қажырлы еңбегі, табандылығы мен жігерінің арқасында қазақ елінің намысын қорғап, Грек-рим күресінен әлемдік деңгейде лайықты танылуға  үлес қосты, - деп хабарлайды "Opennews.kz" ақпарат агенттігі.

Осы орайда, аймақ басшысы Нұрлыбек Нәлібаев  Сыр халқының атынан Айдосқа шексіз алғыс білдіріп, құрмет ретінде пәтер мен автокөлік кілтін табыстады. Бұл сый-сияпат - спортшының жанқиярлық күресі мен жетістіктерінің нақты көрінісі әрі жастарға арналған үлкен мотивация.

Айдос Сұлтанғали - еліміздің спорт тарихында өзіндік орны бар, өз ісіне адал әрі патриот жас спортшы. Оның жеңісі – бүкіл Қазақстанға үлгі, болашақ ұрпаққа бағыт-бағдар береді. Алдағы уақытта да Айдосқа жаңа белестерді бағындыруды, Қазақстан туын жоғары көтеруді тілейміз!

Сыр елі сенім артып, қолдау көрсеткен осындай талантты спортшыларымен мақтанады! Жеңісіңмен шын жүректен құттықтаймыз!