Қазалыда Сапарбек Көбегеновті еске алуға арналған республикалық турнир басталды

13 қараша 2025, 11:18

1 549

Бүгін Қазалы ауданында білікті бапкер, Қазақстан Республикасының Құрметті қызметкері, КСРО спорт шебері Сапарбек Төлегенұлын еске алуға арналған 2011–2022 жылдары туылған жасөспірімдер арасындағы грек-рим күресінен республикалық турнир өзінің шымылдығын түрді. Айтулы спорттық доданың ашылу салтанатына аудан әкімі Алмасбек Есмаханов қатысып, жас балуандарға сәттілік тілеп, турнирді ресми түрде ашық деп жариялады, - деп хабарлайды "Opennews.kz" ақпарат агенттігі.

Спорт инфрақұрылымына ерекше көңіл бөлінуде

Аудан әкімі өз сөзінде мемлекет тарапынан, Президент пен Үкіметтің, сондай-ақ облыс басшылығының қолдауымен Қазалы ауданында спорт инфрақұрылымы қарқынды дамып келе жатқанын атап өтті.

– Ауылдық жерлерде бұқаралық спортты дамытуға арналған заманауи нысандар бой көтеріп, жасөспірімдер спортқа кеңінен тартылуда. Қ.Пірімов және Ү.Түктібаев ауылдарында спорт кешендері салынып, пайдалануға берілсе, бірқатар елді мекендерде спорт және ойын алаңдары тұрғындар игілігіне ұсынылды. Өткен жылы аудан орталығында 200 орындық «Әмір арена» спорт кешені халыққа есігін ашты. Биыл «Ауыл – ел бесігі» бағдарламасы аясында Әйтеке би кентінде, Бекарыстан би және Қожабақы ауылдарында үш бірдей спорт кешенінің құрылысы жүріп жатыр. Мұндай қолдаудың арқасында қазалылық спортшылар жыл сайын ел намысын қорғап, ірі жарыстарда үздік нәтижелер көрсетіп келеді, – деді Алмасбек Әбілқасымұлы.

Әкімнің айтуынша, грек-рим күресі Қазалы ауданында жақсы дамыған спорт түрлерінің бірі саналады. Бұл бағытта жүлдегерлер де, чемпиондар да аз емес. Турнирдің өткізілуі жас балуандардың шеберлігін шыңдап, болашақ спорт жұлдыздарының шығуына серпін береді.

Спорт ардагерлері мен құрметті қонақтар бапкердің еңбегін еске алды

Турнирдің ашылу рәсімінде облыстық мәслихат депутаты Ибайдулла Тілеп, спорт ардагері, Қазалы ауданының «Құрметті азаматы» Қуанған Бәкен және Сапарбек Төлегенұлының туыстары атынан Мұратбек Жарылқасынов сөз сөйлеп, елге белгілі бапкердің өмір жолы мен спорт саласының дамуына қосқан зор үлесін атап өтті.

Сапарбек Көбегенов шәкірт тәрбиелеуде елеулі еңбек етіп, аудан спортының дамуына үлкен серпін берген тұлғалардың бірі болғаны жиында ерекше құрметпен айтылды.

200-ге жуық жасөспірім өзара бақ сынауда

Екі күнге созылатын додаға еліміздің түрлі аймақтарынан – Жамбыл, Ақтөбе, Атырау, Маңғыстау облыстарынан және басқа да қалалардан 200-ге жуық жас балуан қатысып жатыр.

Турнир Әйтеке би кентіндегі №17 олимпиадалық резервтің мамандандырылған балалар-жасөспірімдер спорт мектебінде өтуде. Алғашқы белдесулерді аудан әкімі Алмасбек Есмаханов арнайы қонақтармен бірге тамашалады.

Жеңімпаздар ертең анықталады

Ертең жарыстың қорытындысы шығарылып, үздік нәтиже көрсеткен жасөспірімдер арнайы дипломдармен марапатталады. Сонымен қатар, ұйымдастырушылардың атынан бағалы сыйлықтар табысталады деп жоспарлануда.