Азия чемпионатында Айгерім Сәттібаева қола медаль жеңіп алды
2026 жылғы бокстан Азия чемпионаты аясында қазақстандық боксшы Айгерім Сәттібаева қола жүлдегер атанды, - деп хабарлайды Opennews.kz ақпарат агенттігі Kaz.inform.kz сайтына сілтеме жасап.
7 сәуір күні өткен жартылай финалда отандасымыз алаң иесі Номундари Енх-Амгаланмен қолғап түйістірді. Жекпе-жек жоғары қарқында өтіп, екі боксшы да шабуыл мен қорғанысты ұштастыра отырып, ринг ортасы үшін тартысты айқас көрсетті. Соған қарамастан, төрешілердің бірауыздан қабылдаған шешімімен (5:0) жеңіс моңғолиялық спортшыға берілді. Осылайша, Айгерім финалдық кезеңге өте алмай, турнирді қола жүлдемен аяқтады. Бұған дейін, Айгерім Сәттібаева жарыс барысында сенімді өнер көрсетіп, ширек финалда тәжірибелі қарсылас - Сабина Бобокулованы жеңіп, жүлделі кезеңге жолдама алған болатын. Бұл нәтиже оның халықаралық аренадағы тұрақты көрсеткішінің дәлелі саналады.
Азия чемпионаты Ұланбатыр қаласында өтіп жатыр және оған Азияның үздік боксшылары қатысуда. Турнир нәтижелері ұлттық құрамалардың рейтингтік ұпайларына әсер етіп, алдағы әлемдік жарыстарға іріктеу тұрғысынан да маңызды. Бүгін жарыс аясында Қазақстан құрамасының өзге де спортшылары шаршы алаңға шығады. Күндізгі сессияда Сабыржан Аққалықов (75 кг) моңғолиялық Далай Ганзоригпен, Нұрбек Оралбай (85 кг) Бариахаан Доржпен, ал Айбек Оралбай (90 кг-нан жоғары) түркіменстандық Довлет Исламовпен кездеседі. Кешкі сессияда рингке тағы екі қазақстандық шығады. Атап айтқанда, Оразбек Асылқұлов (60 кг) Әбдірахмон Махмуджоновмен, ал Сағындық Тоғамбай (90 кг) Халимжон Мамасолиевмен қолғап түйістіреді.
