Қазақстандық жеңіл атлеттер халықаралық жарыстарда үш жүлдеге қол жеткізген
Қазақстан құрамасының үш спортшысы жеңіл атлетикадан халықаралық жарыстарда жүлдегер атанған,- деп хабарлайды Оpennews.kz ақпарат агенттігі Ұлттық олимпиадалық комитетке сілтеме жасап.
Елизавета Матвеева Кипрдің Лимасол қаласында өткен EKO Cyprus International Athletics Meeting турнирінде күміс медаль жеңіп алған.
Отандасымыз биіктікке секіру сайысында 185 сантиметр нәтижесін көрсетіп, екінші орынға ие болған.
Ал Кристина Овчинникова Польшаның Белосток қаласында ұйымдастырылған Mityng na Rynku w Białymstoku турнирінде жүлдегерлер қатарынан көрінді. Қазақстандық спортшы 187 сантиметр биіктікті бағындырып, қола медаль еншілеген.
Сондай-ақ Полина Иванова Оңтүстік Кореяның Пусан қаласында өткен World Athletics Challenger сериясында сырықпен секіру жарысында күміс жүлдеге қол жеткізді. Ол 4,20 метр нәтижемен жарысты екінші орынмен аяқтаған.
