«Барыс» сапындағы канадалық хоккейшіге ай сайын 39 млн теңге төленбек

22 маусым 2022, 09:03

188

«Барыс» клубындағы хоккейшілерге ай сайын қанша жалақы төленетіні белгілі болды, деп хабарлайды Ulysmedia.kz.

Клуб хоккейшілерінің бірі Никита Михайлистің жалақысы 32 млн теңге болса, тағы бір ойыншысы канадалық Линден Вейге ай сайын 39 млн теңге төленбек. Бұл жөнінде журналист Аслан Қаженов Facebook-тегі парақшасында жазды.

«Барыс» сапындағы мына жігіт айына 32 млн тг алады деген ақпарат тұр. Жылына – 386 500 000 тг. Біз бір депутат 1 млн алғанына шамданамыз. Мынауың 32 депутаттың ақшасын алып жүр. Ал, нәтиже нөл. Бұлардың елге де, ұлтқа да, спортқа да әкеліп жатқан ештеңесі жоқ. Бір ауыз қазақша сөйлей алмайды. Құрлықтық Лигада плей-оффтан ары аспайды. Әлем чемпионатында 7 команданың 6-ауынан ұтылады. Бірақ, 32 млн жалақы жүріп жатыр», – деп жазды ол.

Ал канадалық хоккейшінің жылдық төлемі 470 млн теңгеге жетіп жығылады. «Барысты» «Самұрық-Қазына» қаржыландырады, демек ұлт спортының дамуына еш пайдасы жоқ легионерлерге төленетін қаржы айналып келгенде халықтың қалтасына түседі. Осы мәселені ашына жазған журналист спортты дамытудан қаржы аямайтын шенеуніктер шаңы шығып жатқан жолдарды жөндеуге келгенде неге ақша бөлуге құлықсыз екеніне таң.

«Бөкей Ордасының жолы жыл сайын жөнделеді деп уәде беріледі. Жөнделмейді. Ақша біресе бөлінбейді, біресе кешігіп бөлінеді. Кешігіп бөлінгеннің өзінде бюджетке кері қайтарылады. Бірақ, қайдағы бір келімсекке ай сайын кешіктірмей және қайтарымсыз 39 млн тг төлеуге дайынбыз», – дейді А.Қаженов.

Еске сала кетейік, Президент Қасым-Жомарт Тоқаев өзінің Қазақстан халқына арналған Жолдауында кәсіби спорт клубтарын мемлекет қаржысы есебінен қаржыландыруды тоқтату керектігін айтқан болатын.