Отандық режиссерлердің 115 киножобасын мемлекет қаржыландырмақ

11 қыркүйек 2023, 14:55

1 390

Отандық режиссерлердің 115 киножобасы 2023 жылғы питчингке өтті. Олардың үздігі мемлекеттен қаржыландыруға ие болады және ұлттық фильмдер ретінде танылады, - деп хабарлайды "Opennews.kz" ақпарат агенттігі Ұлттық киноны қолдау мемлекеттік орталығының баспасөз қызметіне сілтеме жасап.

Бұған дейін жазғанымыздай, конкурсқа қатысуға өтінімдер 9-29 тамыз аралығында жүргізілді. Осы кезеңде киноиндустрия өкілдері үшін төрт бағыт бойынша консультациялық қолдау ұйымдастырылды: Киноорталығының Алматы және Астана қалаларындағы кеңселерінде жеке консультациялар өтті, телефон және әлеуметтік желі арқылы онлайн қойылған сұрақтарға жауап берілді, киножобаларды іріктеу ережелерін түсіндіру мақсатында ашық семинар-тренинг өтті.

Электронды түрде тіркелген өтінімдердің жалпы саны – 271, оның ішінде қағаз жүзінде 261 өтінім келіп түсті. Құжаттарды тексеру қорытындысы бойынша 115 киножоба питчингке өтті. Енді оларды Сараптама кеңесінің мүшелері 8 қыркүйектен бастап 3 қазанға дейін қарастырады. Іріктеу кезеңінен өтпеген қатысушыларға үш жұмыс күні ішінде ресми хаттар жіберіледі, онда өтінімдерді қабылдамау себептері көрсетіледі, – деп хабарлады Ұлттық орталықтың баспасөз қызметінен.

Питчингке өткен киножобалардың тізімі және ашық қорғауды өткізу кестесі сілтеме бойынша қолжетімді. Ашық қорғау биыл 3-5 қазан аралығында өтеді және Киноорталықтың ресми YouTube-каналында онлайн-режимде көрсетіледі.