Қазақстандық суретшілердің туындысы Венеция биеннале көрмесіне қойылады

9 ақпан 2024, 09:38

2 631

Биыл өтетін 60-шы Венециялық өнер биенналесінде Қазақстанның павильоны болады. Көрмеге отандық бірнеше суретшінің туындылары қойылады, - деп хабарлайды "Opennews.kz" ақпарат агенттігі.

Ұйымдастырушылардың айтуынша, Венецияда «Jeruiyq» деген атаумен еліміздің заманауи сурет өнері туындылары ұсынылады. Jeriyq - ізденіс пен жол метафорасы туралы қазақ аңыздарынан алынған утопия. Экспозициялардың бағыты - футуристік.

«Венециялық биенналеге қатысу еліміз үшін өте маңызды, өйткені ол халықаралық деңгейдегі беделді іс-шара. Қазақстанның өз павильоны болады, біз оны жалға аламыз. Бізді демеушілер, меценаттар қолдап отыр, шығындардың негізгі бөлігін солар жабады. Бюджеттен қаржы қарастырылмаған, министрлік көрмеге қатысуды ақпараттық және басқа жолдармен қолдайды», - деді көрме кураторы Данагүл Төлепбай 60-шы Венеция өнер биенналесінде Қазақстанның көрмесін ұйымдастыруға орай өткен баспасөз мәслихатында.

Екі жылда бір өтетін халықаралық көрмеге еліміз ресми екінші жыл қатысқалы отыр.

«2000 жылдардың басында Қазақстанда заманауи өнер аса жоғары деңгейде болмады, қазір бізде тәжірибе жеткілікті. Отандық суретшілердің кейінгі буыны шетелде білім алып, халықаралық деңгейдегі көрмелерге қатысып жатыр. Қазір біз мәдениетімізді көрсету үшін шетелдік әріптестерімізге жүгінбей-ақ өзімізді ұсынуға дайынбыз», - деді көрменің тағы бір кураторы Әнуар Мүсірепов.

60-шы Венециялық өнер биенналесінде қазақ сурет өнерінің көрмесі биыл 20 сәуір мен 24 қараша айы аралығында өтеді. Оған отандық суретшілер Камиль Муллашев, Ерболат Төлепбай, Сәкен Нарынов, The2vvo тобы (Лена Позднякова, Эльдар Таги), Сергей Маслов және Анвар Мусреповтің туындылары қойылады.