Елімізде театр билеттері бір жылда 42%-ға қымбаттаған

Қазақстанда театр билеттерінің бағасы бір жылда 41,5%-ға өскен. Былтыр осы кезеңде театр қызметтерінің бағасы бір жылда небәрі 7,2%-ға қымбаттаған, - деп хабарлайды Opennews.kz ақпарат агенттігі.

Finprom.kz дерегінше, бағаның ең жоғары өсімі Алматыда тіркелді, онда билеттер 74,1%-ға қымбаттады. Астанада театр билеттері 25,7%-ға, Ақтөбе облысында 37,5%-ға, Павлодар облысында 30%-ға және Абай облысында 29,2%-ға қымбаттаған.

Соған қарамастан, Қазақстандағы театр билеттерінің орташа бағасы көрші елдермен салыстырғанда төмен. Қыркүйек айындағы орташа баға шамамен 3 мың теңге немесе 6,7 долларды құрады.

Қазақстанда театрлар саны да артып келеді. Өткен жылдың қорытындысы бойынша елде 85 театр жұмыс істеген. Бұл 2024 жылмен салыстырғанда 11 театрға көп. Алматыда жаңа жеке театрлардың ашылуына байланысты олардың саны көбейген.

Сонымен қатар өткен жылы театрларға барған көрермендер саны 3,2 млн адамға жетіп, бір жылда 2,5%-ға өскен. Театрлар 390-нан астам жаңа қойылым ұсынған.