Әлемдегі ең танымал газет Димаш Құдайберген жайлы жазды

 Екі ғасырға жуық тарихы бар танымал газет басылымдардың бірі El Mercurio газетінде Димаш Құдайберген жайлы мақала жарияланды, - деп хабарлайды Opennews.kz ақпарат агенттігі.

Dimashnews.com сайтының жазуынша, 26 наурызда жарық көрген мақалада автор қазақ әншісінің вокалдық диапазоны және оның музыка әлеміне ықпалы жайында егжей-тегжейлі баяндайды.

Сонымен қатар онда Димаш Құдайбергеннің 2 жылға созылған пандемиядан кейін концерттік турнесінің басталғаны туралы жазылған.

«Димаш шығармашылығының Оңтүстік Америкаға таралуы өз жемісін бере бастағанына өте қуаныштымыз. Біз Dimash Latin Dears фан-клубымыздың атынан өте көп іс-шара өткіземіз. 2023 жылы Чилиде ең ірі «Винья-дель-Мар» ән фестивалі өтеді. Ұйымдастырушылар Твиттердегі аккаунтында көрермендерден фестиваль сахнасынан кімді көргісі келетіндігін сұрапты. Әрине, біздің ең үлкен арманымыз – ол сол жерде Димашты көру», - деді Dimash Latin Dears фан-клубының әкімшісі.

«Меркурий» (El Mercurio) газеті Чилидегі ең мәртебелі әрі ескі басылымдардың бірі саналады. Оның алғашқы нөмірі 1827 жылдың 12 қыркүйегінде Вальпараисо қаласында жарық көрген. Ал 1900 жылдың 1 маусымынан Сантьяго қаласынан шыға бастады. Бүгінде «Меркурий» испан тілінде күн сайын шығады және сатылымы жағынан Сантьяго қаласының рекордшысы саналады.