Қазақстан Kotak-тан бұрын Am банкпен байланыс орнатқан

AmBank Group-пен алғашқы мәмілелер кем дегенде осыдан 10 жыл бұрын жасалған екен, деп хабарлайды Opennews.kz ақпарат агенттігі Экспресс К сайтына сілтеме жасап.



Мәліметтер араб-малайзиялық (осыдан Am атауы шыққан) қаржы ұйымының веб-сайтында жалпыға қолжетімді.

Айта кетейік, Қазақстан туралы ақпараттар аталған веб-сайттың "Шетелдік эмитенттер" бөлімінен табылды. Ол жерде әртүрлі елдердің қаржы институттары мен ұйымдарының арасында акцияларының 100 пайызы "Бәйтерек" Ұлттық холдингіне тиесілі "Қазақстанның Даму Банкі" АҚ аталды. Сондай-ақ банк Sukuk Murabahah бағдарламасы бойынша құны 1,5 миллиард малайзиялық ринггитті (шамамен 163 миллиард теңге) шығарғаны туралы хабарланған.

Сонымен қатар, марапаттау бөлімінде AmBank Group-тың 2013 жылы исламдық қаржыландыру саласындағы ҚДБ-мен ең жақсы мәміле үшін The Asset Triple A Awards сыйлығын алғаны туралы ақпарат бар.

Алайда біз дәл осы мәмілелер туралы ашық дерек көзінен егжей-тегжейлі ақпарат таппадық. Бұл тақырыпқа байланысты редакция Қазақстанның уәкілетті органдарына сауал дайындап жатыр.


Айта кету керек, өткен ғасырдың 70-ші жылдарының ортасында құрылған AmBank Group — Малайзиядағы ең ірі банктік топтардың бірі. Сондай-ақ оның мүдделері банктік операциялардан бөлек, өмірді сақтандыру мен жалпы сақтандыруды қамтиды.

2015 жылы бұл банк үлкен жанжалға тап болды. Малайзияның бұрынғы премьер-министрі Наджиб Разак жергілікті мемлекеттік стратегиялық даму компаниясынан өзіне қатысты шоттарға ірі соманы аударғаны туралы желіге құжаттар тараған еді.

Дәл осы оқиғадан екі жыл бұрын AmBank Group-тың негізін қалаушы Хусейн Наджадиге қастандық жасалып, ол қаза тапқан еді. Оның өліміне қатысты түрлі нұсқа бар. Мәселен, ол Малайзия премьер-министрінің қылмыстық әрекетінен хабардар болуы мүмкін деген бейресми ақпарат тарады. Алайда, кісі өлтіруге тапсырыс бергендер табылған жоқ. Ал әлгі Разак 2020 жылы жемқорлық үшін 12 жылға сотталды.