Қазақстанда тұрғындардың зейнетақы жинағы 15 трлн теңгеден асты

Қазақстандықтардың Бірыңғай жинақтаушы зейнетақы қорындағы жинағының жалпы сомасы 15,1 трлн теңгеге жетті, - деп хабарлайды "Opennews.kz" ақпарат агенттігі.

Ranking.kz порталының дерегінше, былтырғы осы уақытпен салыстырғанда зейнетақы жинақтарының көлемі бірден 11,4 пайызға немесе 1,5 трлн теңгеге өсті. Көрсеткіштің өсуі жарналар түріндегі кіріс ағындары, сондай-ақ инвестициялық кіріс есебінен қалыптасты.

Жинақтардың өсуі жарналардың барлық түрлері бойынша байқалады. Осылайша, міндетті зейнетақы жарналары бойынша жинақ көлемі 11,1 пайызға артып, 14,7 трлн теңгеге жетті. Бұл қазақстандықтардың барлық жинақтарының 97 пайызын құрайды.

Міндетті кәсіптік зейнетақы жарналары бойынша зейнетақы жинақтары бір жылда 21 пайызға артып, 466,4 млрд теңгеге жетті. Бұл ретте ең көп өсім (2 еседен астам) 3,8 млрд теңгені құраған ерікті зейнетақы жарналары болды.

Өңірлер бойынша зейнетақы жинақтарының ең көп мөлшері Алматыда - 2,8 трлн теңге немесе республикадағы жалпы көлемнің 18,5 пайызы. Одан кейін Астана - 1,4 трлн теңге. Үздік үштікті Қарағанды облысы түйіндеді - 1,2 трлн теңге.

Зейнетақы жинақтарының көлемі бойынша көш бастаған бес аймаққа Шымкент (1,2 трлн теңге) қаласы мен Шығыс Қазақстан облысы (832,5 млрд теңге) да кірді.