"Қарапайым шаруалар үшін субсидия алу – қияметтің қиыны" - Тоқаев
Мемлекет басшысы Қасым-Жомарт Тоқаев елімізде қарапайым шаруалар үшін субсидия алу өте күрделі екенін айтты, - деп хабарлайды "Opennews.kz" ақпарат агенттігі.
«2019-2021 жылдары өнім өңдеуге берілген субсидияны алайық. Бұл қаражаттың тең жартысы субсидия алам деушілердің 10 пайызының ғана қолына тиген. Субсидия алған кейбір пысықайлар өндірісті өркендетудің орнына бюджет қаржысын қалтасына басып, шалқып өмір сүрген. Ал қарапайым шаруалар үшін субсидия алу – қияметтің қиыны», - деді Мемлекет басшысы.
Осы орайда Президент бұл саладағы жүйе тым күрделі екенін айтты.
«Оның үстіне, субсидия беру жүйесі өте күрделі және қажетті мәлімет көпшілікке қолжетімді емес. Субсидия бөлуді реттейтін жаңа цифрлық жүйе бұл түйткілді шеше алмай тұр. Әрине, біршама жұмыс атқарылды. Мұны жоққа шығаруға болмайды. Бірақ бұл бағыттағы жұмысты аяғына дейін жеткізу керек», - деді Қасым-Жомарт Тоқаев.
