Қандай жеке кәсіпкерлік автоматты түрде жабылады
2026 жылға дейін патент немесе арнайы мобильді қосымша арқылы жұмыс істеп келген жеке кәсіпкерлік жаңа арнайы салық режиміне ауыспаса, тіркеуден шығарылады, - деп хабарлайды "Opennews.kz" ақпарат агенттігі.
1 қаңтардан бастап Қазақстанда көптеген салық режимінің күшін жоятын жаңа Салық кодексі күшіне енді. Осы режимдер бойынша жұмыс істеген жеке кәсіпкерлік нысандары 2026 жылдың 1 наурызына дейін жаңа режимге көшуге тиіс.
Мемлекеттік кірістер комитеті хабарлағандай, жеңілдетілген декларация негізінде арнайы салық режимін қолдануды жоспарлап отырған, бірақ өтініш бермеген жеке кәсіпкерлік нысандары көктемнен бастап жалпыға бірдей белгіленген салық салу тәртібіне автоматты түрде көшіріледі.
Патент бойынша немесе арнайы мобильді қосымша арқылы жұмыс істеген, бірақ жаңа салық режиміне ауыспағандар тізілімнен алып тасталады.
Көптеген азаматтар жаңа арнайы салық режиміне ауысуға өтінішті 2025 жылы беріп қойған. Бұл қате. Мұндай өтініштер қарастырылмайды.
Сондықтан қолданылатын салық режимі туралы хабарламаны ұсынбаған немесе 2025 жылдың соңында ұсынған жеке кәсіпкерлер қайта тапсыруы керек. Қайта тапсыру мүмкіндігі 12 қаңтардан бастап келесі қызметтер арқылы қолжетімді:
- Салық төлеушінің кабинеті;
- E-Salyq Business арнайы мобильді қосымшасы;
- мемлекеттік кіріс басқармасы;
- кейбір банктердің қосымшалары арқылы.
Жеке кәсіпкерлік жойылғаннан кейін, қазақстандықтар өзін-өзі жұмыспен қамтушы ретінде жұмыс істей алады. Бұл жағдайда олар салықтан босатылады. Олар тек әлеуметтік аударымдардың 4 пайызын төлеуі керек, бірақ азаматтардың кейбір санаттары үшін бұл мөлшерлеме 3 пайыз, ал кейбіреулері мүлдем ештеңе төлеуге міндетті емес.
