Үкімет халық табысын арттыруға басымдық береді

ҚР Премьер-министрінің орынбасары — Ұлттық экономика министрі Серік Жұманғарин Президенттің V Ұлттық құрылтайда берген тапсырмаларының орындалу барысы туралы мәлімдеді, - деп хабарлайды "Opennews.kz" ақпарат агенттігі.

Министрдің айтуынша, Үкімет Ұлттық банк және Қаржы нарығын реттеу агенттігімен бірлесіп, 2026–2028 жылдарға арналған макроэкономикалық тұрақтандыру және халықтың әл-ауқатын арттыру бағдарламасын іске асыруды жалғастырады. Негізгі мақсат — халықтың табысын өсіру.

Биыл нақты табыстың өсімі 2,3%-дан жоғары болады, ал экономикалық өсім кемінде 5% деңгейінде қамтамасыз етіледі. Бұл үшін инвестиция көлемі жалпы ішкі өнімнің 18%-ына дейін ұлғайтылады.

Сонымен қатар, шикізаттық емес секторды дамытуға, еңбек өнімділігін арттыруға, экономиканы технологиялық жаңартуға және цифрландыруға ерекше көңіл бөлінеді. Кәсіпкерлікті қолдау кеңейіп, жаңа өндірістерді дамытуға бағытталған проактивті инвестициялық саясат іске асады.

Экономикалық өсімді қолдау үшін «Бәйтерек» холдингінің рөлі күшейтіліп, биыл 1 трлн теңгеге капиталдандырылады. Нәтижесінде экономиканың нақты секторына шамамен 8 трлн теңге көлемінде қолдау көрсетіледі.

Негізгі басымдық экспортты ұлғайту мен импортты алмастыруға бағытталған терең өңдеу өндірістерін дамытуға беріледі.