Бухгалтер 118 миллион теңгені құмар ойынына тіккен
Батыс Қазақстан облысында мемлекеттік кәсіпорын бухгалтері аса ірі көлемде бюджет қаражатын жымқырды деген күдікке ілінген,- деп хабарлайды Оpennews.kz ақпарат агенттігі.
Тергеу мәліметінше, лудоманияға шалдыққан қызметкер 118 миллион теңгені 1XBet букмекерлік кеңсесінде бәске тігіп, ұрланған қаржыға автокөлік сатып алған.
Батыс Қазақстан облысының прокуратурасы мемлекеттік кәсіпорындардың бірінде аса ірі көлемде бюджет қаражатын жымқыру дерегін анықтаған.
Аталған факті бойынша Қазақстан Республикасы Қылмыстық кодексі 189-бабы 4-бөлігінің 2-тармағына сәйкес сотқа дейінгі тергеп тексеру басталды. Тергеу амалдарын арнайы прокурорлар жүргізіп жатыр.
Сот санкциясымен күдікті тергеу изоляторына қамауға алынған, ал сатып алынған автокөлікке тыйым салынған.
