Елімізге шетелден келетін мұнайдың тасымалдау мерзімі ұзартылды

АҚШ Қазақстанға Ресей мұнайын Қытайға транзитпен тасымалдауға мүмкіндік беретін лицензияны 2027 жылғы 19-шы наурызға дейін ұзартты, - деп хабарлайды Opennews.kz ақпарат агенттігі Egemen.kz сайтына сілтеме жасап.

Bloomberg мәліметінше, Ресей мұнайын Қазақстан аумағы арқылы тасымалдау көлемі алдағы кезеңде тұрақты деңгейде сақталады. Сарапшылардың бағалауынша, бұл бағыт арқылы тәулігіне шамамен 200 мың баррель мұнай жеткізуге мүмкіндік бар. Бұл шешім ең алдымен жаһандық энергетикалық нарықтағы тұрақсыздыққа байланысты қабылданған. Әсіресе Парсы шығанағы елдерінен жеткізілімге қатысты тәуекелдердің артуы, Ормұз бұғазы маңындағы қауіпсіздік мәселелері және Таяу Шығыстағы геосаяси шиеленіс балама бағыттардың маңызын арттырып отыр.

Осы жағдайда Қазақстан арқылы өтетін транзиттік дәліз жеткізілімнің сенімді әрі тұрақты арнасы ретінде қарастырылады. Сарапшылар бұл бағыттың сақталуы Ресейдің экспорттық әлеуетін қолдауға, Қазақстанның өңірлік транзиттік хаб ретіндегі рөлін күшейтуге және басқа бағыттарға түсетін жүктемені азайтуға ықпал ететінін атап өтеді. Қазақстан мен Ресей өкілдері мұнай транзитінің көлемін ұлғайту мүмкіндігін де талқылап жатыр. Жылдық тасымал көлемін 12,5 млн тоннаға дейін жеткізу мәселесі күн тәртібінде тұр. Сарапшылардың пікірінше, егер бұл жоспар жүзеге асса, Қазақстанның көлік-логистикалық әлеуеті артып, ел бюджетіне түсетін транзиттік түсімдер де ұлғаюы мүмкін. Бұл қадам аймақтағы энергия жеткізілімдерінің әртараптандырылуына қосымша серпін береді.