Шетелдіктер Қазақстаннан мұнай мен газ сатып алмақшы

Чехия Еуроодақтан тыс елдермен, соның ішінде энергетикалық ресурстар жеткізуші мемлекеттермен сенімді әрі тұрақты серіктестік тетіктерін қарастырып жатыр,- деп хабарлайды Opennews.kz ақпарат агенттігі Egemen.kz сайтына сілтеме жасап.

Бұл туралы Чехия премьер-министрі Андрей Бабиш мәлімдеген. 

Премьер-министр ірі бизнес-делегациямен бірге төрт күндік сапармен Әзербайжан, Қазақстан және Өзбекстанға аттанатынын айтты. Делегация құрамында энергетика, көлік, машина жасау және қорғаныс салаларындағы Чехияның ірі 50-ге жуық компаниясының өкілдері бар. Сапар барысында басты назар мұнай мен газ жеткізу бойынша келіссөздерге аударылады. Сонымен қатар бизнес-форумдарға қатысу жоспарланған. Бағдарлама аясында Чехия премьер-министрі Астанада Қазақстан Премьер-министрі Олжас Бектеновпен келіссөздер жүргізеді. Сондай-ақ ол ел Президенті Қасым-Жомарт Тоқаевпен кездеседі.