Педагогтердің білімін бағалауға өтініш қабылдау басталды

Педагогтердің білімін бағалау 3-22 сәуір аралығында өтеді, деп хабарлайды "Opennews.kz" ақпарат агенттігі.

Бүгіннен бастап app.testcenter.kz сайтында педагогтердің білімін бағалауға өтініштерді қабылдау жүргізіледі.

Бұл тестілеуге:

- мектепке дейінгі тәрбие мен оқыту ұйымдарының педагогтері;

- білім беру ұйымдарының әдіскерлері (әдістемелік кабинеттердің (орталықтардың) әдіскерлерінен басқа);

- жалпы орта білім беру ұйымдарының педагогтері;

мқосымша білім беру ұйымдарының (интернаттық ұйымдардың, жатақханалардың тәрбиешілері, арнайы ұйымдардың тәрбиешілері үшін) педагогтері;

- білім беру ұйымдарының, әдістемелік кабинеттердің (орталықтардың) басшылары;

- техникалық және кәсіптік, орта білімнен кейінгі білім беру ұйымдарының ( жалпы білім беретін пәндер бойынша, сондай-ақ жалпы кәсіптік және арнайы, жалпы гуманитарлық және әлеуметтік-экономикалық пәндер бойынша) педагогтері;

- педагогикалық бағыттар бойынша жоо және колледж бітіруші түлектері (бакалавриат-күндізгі, бакалавриат-қысқартылған, магистратура);

- педагогикалық (мамандықтар) бағыттар бойынша техникалық және кәсіптік, жоғары және/немесе жоғары оқу орнынан кейінгі білімі бар, тәжірибесі жоқ кандидаттар (оның ішінде 2022 жылғы түлектер) қатыса алады.

Айта кетейік, педагогтердің білімін бағалау бұған дейін Ұлттық біліктілік тестілеу (ҰБТ(НКТ)) деп аталған.

№1. Кімдер қатыса алады?

Тестілеуге қатыса алады:

мектепке дейінгі тәрбие мен оқыту ұйымдарының педагогтері;

білім беру ұйымдарының әдіскерлері;

жалпы орта білім беру ұйымдарының педагогтері;

қосымша білім беру ұйымдарының педагогтері;

білім беру ұйымдарының, әдістемелік кабинеттердің басшылары;

техникалық және кәсіптік, орта білімнен кейінгі білім беру ұйымдарының педагогтері;

педагогикалық бағыттар бойынша ЖОО және колледж бітіруші түлектері;

педагогикалық бағыттар бойынша техникалық және кәсіптік, жоғары және жоғары оқу орнынан кейінгі білімі бар, тәжірибесі жоқ кандидаттар.

№2. Өтініш қалай қабылданады?

Өтініштер Ұлттық тестілеу орталығының сайтында қабылданады:

Ең алдымен электронды поштаны жазып, сайтқа тіркелу қажет.

Электронды поштаңызға растау туралы хат келеді. Хатта пайдаланушы аты мен құпиясөз де көрсетіледі.

"Электронды мекенжайды растау" батырмасын басып, жаңадан ашылған бетте хаттағы пошта мен құпиясөзді енгізіп, кіру батырмасын басасыз.

ЖСН нөміріңізді, байланыс телефоныңызды енгізіп, сақтау батырмасын басасыз.

ЖСН жоқ адамдар "ҚР ЖСН жоқ" дегенді таңдап, аты-жөнін жазып, ұлты, азаматтығы, жынысы, туған күні, құжат нөмірі, байланыс телефоны туралы ақпаратты толтырады.

Мәліметтерді сақтағаннан кейін "Менің парақшам" беті ашылады. Бұл жерде мәліметтерді өзгертуге, өтініш беруге, электронды поштаны ауыстыруға, құпиясөзді өзгертуге болады.

Ескерту: бір электрондық пошта арқылы бір ғана қолданушы тіркеле алады.

№3. Қалай өтініш береді?

app.testcenter.kz сайтына тіркелгеннен кейін парақшадағы "Өтініш беру" батырмасын басып, "педагогтердің білімін бағалау" тестілеуін таңдау керек.

Содан кейін тестілеуге қатысатын санаттар шығады. Өзіңізге сай қызмет түрін таңдап, жұмыс орнын белгілеп, оқу орны, диплом, біліктілік санаты секілді қажет жеке мәліметтерді енгізу қажет.

Тестілеу параметрлерінде облыс, тест тапсыру уақыты мен орны, тілі, тестілеу блогы сұралады. Тест тапсыру уақытында бос орындар көрсетіледі.

Барлық мәліметті енгізгеннен кейін өтініш беруші "келісемін" деген белгі қойып, ережелермен келісетінін растауы қажет. Содан кейін "өтініш беру" батырмасын басады.

Өтініш қабылданғанын жеке кабинеттегі "Менің іс-әрекетім" бөлімінен көре аласыз. Оны ашып, барлық мәліметтің дұрыстығына көз жеткізіңіз. Көзі көрмейтін педагогтер өтініш берген кезде "көру қабілеті бойынша мүгедектік" деген белгіні таңдай алады.

№4. Тестілеу уақыты мен орнын өзгертуге бола ма?

Иә, болады. Ол үшін жеке кабинеттегі "Менің іс-әрекетім" бөліміне кіріп, өтінішіңіздегі мәліметтерді өзгерте аласыз. Не болмаса өтінішті жойып, қайтадан өтініш бере аласыз. 

Ескерту: өтініштерді қабылдау базасы жабылғаннан кейін тестілеуді тапсыру орны мен уақытын, тестілеу тілі мен пәндерін өзгерту мүмкін емес.

№5. Педагог тесті неше рет тапсыра алады?

Педагогтер тестілеуді жылына екі рет тапсыра алады. 12 ай ішінде берілген өтінім саны асып кетсе де, сәуір айындағы тестілеуге қатыса алады. 3-22 сәуір аралығында екі рет тапсыруға болады. Сәуір айындағы педагогтердің білімін бағалау тегін өтеді.

№6. Тест қанша тапсырмадан тұрады?

Тест 50 тапсырмадан тұрады:

"Пәндік білім" бойынша – 30 тапсырма;

"Оқыту әдістемесі" бойынша – 20 тапсырма.

Тапсырмалардың формасы екі түрлі:

бір дұрыс жауабы бар тапсырмалар;

бір дұрыс жауабы бар мәнмәтіндік тапсырмалар.

Тест сынақтарын білім беру саласындағы уәкілетті орган әзірлейді.

№7. Тестілеуге қанша уақыт беріледі?

Тест тапсыруға 90 минут уақыт берілсе, "Математика", "Физика", "Химия", "Информатика" пәндері бойынша тестілеуден өтетін педагогтер үшін тест 125 минутқа созылады.

№8. Қандай заттарды қолдануға болмайды?

Тыйым салынған заттар:

ұялы байланыс құралдары (пейджер, ұялы телефондар, планшеттер);

iPad (Ipad), iPod (iPod), iPhone (iPhone), смартфон, смарт сағат;

ноутбуктер, ойнатқыштар, модемдер (мобильді маршрутизаторлар);

радиоэлектрондық байланыстың кез келген түрі (Wi-Fi);

Bluetooth, Dect, 3G, 4G, 5G;

құлаққаптар (сымды және сымсыз);

шпаргалкалар және оқу-әдістемелік әдебиеттер;

калькуляторлар және түзету сұйықтықтары.

№9. Тыйым салынған затты қолданса, қандай жаза бар?

Өтініш беру кезінде мақұлдаған келісімде сертификаттаудан өтетін ғимаратта тыйым салынған заттардың біреуін пайдалануға тырысқаны үшін жауапкершілік алатыны жазылған. Тест тапсырушыдан тыйым салынған зат табылса ол бір жыл мерзімге сертификаттаудан өту құқығынан айырылады. Бейнежазбаны қарағанда тыйым салынған зат қолданғаны анықталса нәтижелердің күші жойылады.

№10. Сайтқа тіркеле алмаса, не істеу керек?

Ұлттық тестілеу орталығының testcenterkz атты Instagram парақшасына жаңа пошта мен ЖСН-ді жазып жіберу қажет. Сауалдар кезекпен қаралады. 

Педагогтердің білімін бағалауға қатысты барлық ақпаратты Ұлттық тестілеу орталығының сайтынан "Педагогтерге" бөлімінен біле аласыз.

Портфолио мен санат туралы сұрақтар бойынша мектеп әкімшілігіне не өз аймағыңыздағы білім басқармасына хабарласу керек.