БІЛІМ БЕРУ ГРАНТЫ КОНКУРСЫНА ҚАТЫСУҒА ҚҰЖАТТАРДЫ ТАПСЫРУ ЖАЛҒАСУДА
13 шілдеде білім беру гранттары тағайындау конкурсына қатысу үшін өтініштер қабылдау кампаниясы басталды, ол 24 шілдеге дейін жүргізіледі, - деп хабарлайды "Opennews.kz" ақпарат агенттігі.
Құжаттарды қабылдау еGov арқылы онлайн форматта немесе кез келген ЖОО (орналасқан жері бойынша) арқылы офлайн форматта тапсыруға болады, сонымен қатар виртуалды қабылдау комиссиялары да жұмыс істеуде.
М.Әуезов атындағы Оңтүстік Қазақстан университетінде білім беру гранттарының конкурсына грантқа құжат тапсыруға келіп жатқан егіздер саны көп екен. Күніне кемінде 3-4 егіз құжат тапсырып, өз мамандықтарын таңдауда. Солардың бірі – Нұрбану мен Гүлбану.
Егіздердің әкесі – Асқар Төлегенов. Мектепте ағылшын тілінен сабақ береді. Түркістан облысының Келес ауданы, Боссу ауылының тұрғыны әрі ұстаз қыздарымен бірге келіп, бүгін құжаттарын қабылдау комиссиясына тапсырды. –Сырдария атындағы №44 мектепті «Алтын белгіге» бітірдік. ҰБТ-да жоғары балл алдық. Құжаттарымызды бүгін М.Әуезов атындағы ОҚУ қабылдау комиссиясына грант конкурсына тапсырдық. Ұстаз болсақ деген үлкен арманмен келдік, - дейді егіздер.
Келушілерге қызмет көрсету деңгейін жақсартуда «AlmaTurn» QR – электрондық кезек жүйесі орнатылған. Қабылдау комиссиясының жұмысына 70-ке жуық қызметкер жұмылдырылған. Құжат тапсыруға келген талапкерлер және олардың ата-аналарына ыңғайлы болуда 3 қызмет көрсету залы, 300 орындық күту залы, 1 кеңес беру залы және 1 өзіне өзі қызмет көрсету залы қарастырылған. Құжат тапсырып жатқан талапкерлердің қатары артып жатқандықтан Әуезов университетінің қабылдау комиссиясы қарқынды жұмыс істеп жатыр.
М.Әуезов атындағы Оңтүстік Қазақстан университетінде 13 шілдеден бері 3000-нан аса өтініш қабылданды.