"Шетелге жұмысқа" дайындау орталығы ашылды

5 маусым 2025, 09:21

2 276

Бұл бастама қазақстандықтардың шетелге жұмысқа бармас бұрын жақсы дайындалып, құқықтық және ақпараттық тұрғыда қорғалуын көздейді,- деп хабарлайды "Opennews.kz" ақпарат агенттігі.

Орталық Астана қаласы әкімдігінің Мансап орталығы ғимаратында ашылды. Мұнда азаматтарға еңбек көші-қонының құқықтық, мәдени және практикалық аспектілері туралы толық ақпарат беріледі. Орталық мигранттардың құқықтары, шетелде бейімделу және заңды еңбекке дайындық сияқты маңызды тақырыптарды қамтиды.

Жобаны Халықаралық көші-қон ұйымы (ХКҰ) ҚР Еңбек және әлеуметтік қорғау министрлігімен, Астана әкімдігімен және Швейцарияның даму және ынтымақтастық агенттігінің (SDC) қолдауымен іске асырды.

«Орталықтың ашылуы – ол еңбек көші-қон қауіпсіздігі және басқарылуы жолындағы маңызды қадам. Біз шетелге жұмысқа баратын әрбір азаматтың өз құқығын білуіне және өзін сенімді сезінуіне ұмтыламыз», - деп атап өтті Халықаралық көші-қон ұйымының (ХКҰ) Қазақстандағы миссиясының басшысы Серхан Актопрак.

Орталықтың ашылуы Орталық Азиядағы басқарылатын еңбек көші-қонын дамыту жөніндегі ХКҰ өңірлік бағдарламасының бөлігі болып саналады.