Ауыл мектептері цифрландыру кезеңіне өтеді
Оқу-ағарту министрі Жұлдыз Сүлейменова «Қазақстан халқына» қорының басқарма төрағасы Ләззат Шыңғысбаевамен кездесіп, ауыл және қала мектептері арасындағы білім алшақтығын азайту мәселесін талқылады,-деп хабарлайды Opennews.kz ақпарат агенттігі BAQ.kz сайтына сілтеме жасап.
Кездесу барысында «Qazaq Digital Mektebi» инновациялық жобасын қаржыландыру және инвесторларды тарту тетіктері талқыланған. Жоба 2026 жылдың қыркүйегінде еліміздің жеті өңірінде іске қосылмақ. Солтүстік Қазақстан, Қостанай, Ақмола, Павлодар, Батыс Қазақстан, Ақтөбе және Шығыс Қазақстан облыстарындағы шағын жинақты мектептер жобаның алғашқы қамтылатын нысандары болады. Қазіргі таңда жобаның тұжырымдамасы бекітіліп, іріктелген мектептердің техникалық жағдайы зерттелуде. Жергілікті атқарушы органдармен бірлесіп, білім беру ұйымдарын заманауи құрал-жабдықтармен қамтамасыз ету, сонымен қатар цифрлық инфрақұрылымды дамыту жұмыстары жүргізілуде.
«Qazaq Digital Mektebi» бағдарламасының басты мақсаты – ауыл мектептерінде оқытуды басқарудың ұлттық цифрлық платформасын енгізу және оны сапалы білім беру контентімен толықтыру. Жоба жүзеге асқан жағдайда ауыл оқушылары сапалы білімге қол жеткізіп, олардың бәсекеге қабілеттілігі айтарлықтай артады.
Бұл бастама елдегі адами капиталды дамытуға және білім беру жүйесін цифрландыруға серпін беретін маңызды қадам болмақ. Сонымен қатар, жобаның ауқымы кеңейтілген жағдайда ауылдық жерлердегі педагогтердің кәсіби дамуына да қолдау көрсетіледі, оқушылар мен мұғалімдер арасында цифрлық сауаттылық деңгейі артады. Жобаны жүзеге асыру барысында заманауи технологияларды қолдану, интерактивті оқыту әдістерін енгізу және оқу процесін цифрлық платформа арқылы басқару қарастырылған. Бұл ауыл мектептерінде білім сапасын арттыру мен оқушылардың білім алу мүмкіндігін теңдестіруге мүмкіндік береді.
